Nýr meirihluti Sjálfstæðisflokks, Framsóknar og Viðreisnar í borginni var kynntur hátíðlega á blaðamannafundi í Viðey í gær. Þar með liggur fyrir að ekkert verður af tveggja flokka meirihluta Sjálfstæðis- og Miðflokksmanna sem margir höfðu séð fyrir sér í hillingum. Verðandi borgarstjóri, Hildur Björnsdóttir, kynnti svo óvænt að hún ætlaði að bjóða oddvita Miðflokksins í borginni, Ara Edwald, að taka við stjórnarformennsku í Orkuveitunni. Hvers vegna myndi Hildur bjóða slíka stöðu til oddvita flokks sem mun sitja í minnihlutanum? Þessu veltu fyrrum þingmennirnir Páll Magnússon og Vigdís Hauksdóttir fyrir sér í Bítinu í morgun. Bæði telja að Ari ætti að afþakka boðið, en sú síðarnefnda telur ljóst að brögð séu í tafli.
Vigdís Hauksdóttir segist ekki vera sár yfir því að Miðflokkurinn verði ekki í meirihluta í borginni, hún telur þó að Sjálfstæðisflokkurinn hafi gert mistök.
„Ég hef sagt það áður að það er alveg sama hvað það er kosið í Reykjavík í borgarstjórnarkosningum, Dagur B. Eggertsson kemur alltaf upp úr kjörkössunum og það má eiginlega heimfæra þetta á það að þarna er Hildur að taka með sér fulltrúa tveggja flokka sem hafa þjónað sem varadekk í borgarstjórn Reykjavíkur í mörgföllnum meirihluta Dags og Samfylkingarinnar undanfarnar kosningar. En þetta æxlast svona, þetta er val Hildar og það er ekkert við því að segja. Miðflokkurinn kemur sterkur inn í minnihluta.“
Páll telur að staða Hildar hafi verið snúnari heldur en fólk átti sig á. Það hafi legið fyrir að hvort sem hún leitaði til Miðflokks eða Viðreisnar og Framsóknar þá yrði einhver reiður. Hún hafi metið það svo að það yrðu minni óþægindi að ganga í meirihluta með Viðreisn og Framsókn, en það kom Páli hins vegar á óvart hversu mikil andstaðan við nýjan meirihluta hefur verið hjá Sjálfstæðismönnum.
„Andstaðan er meiri og harkalegri heldur en ég hafði gert ráð fyrir og fögnuður þeirra sem ættu kannski að fagna þessu minni heldur en ég hafði gert ráð fyrir. Meðal annars hjá forystu flokksins þá eru þetta svona frekar dræmar undirtektir.“
Orkuveituboðið – friðþæging eða gildra?
Páll veltir svo fyrir sér útspili Hildar Björnsdóttur, að bjóða Ara Edwald, oddvita Miðflokksins, að taka að sér stjórnarformennsku í Orkuveitunni. Páli þótti þetta virkilega sérkennilegt.
„En það sem mér finnst furðulegast í því samhengi er að hann skuli ekki hafa hafnað því point black strax,“ segir Páll því hvort sem Hildur hafi meinað það þannig eða ekki þá megi túlka þetta sem ákveðin skilaboð:
„Heyrðu, við treystum ykkur ekki, við hvorki viljum né getum unnið með ykkur, en hérna færðu hálfa milljón á mánuði og þegiðu svo og vertu góður.“
Þetta séu skilaboðin sem megi lesa úr þessu og því telur Páll að Ari hefði átt að segja nei strax og alls ekki segjast ætla að hugleiða tilboðið, eins og hann gerði. Með því að íhuga tilboðið, hvað þá með því að taka því, sé Ari að samþykkja að eiga afkomu sína undir því að meirihluti sem hann tilheyrir ekki og er á móti lifi sem lengst.
„Hvers konar rugl er þetta eiginlega,“ segir Páll sem bendir á að hagsmunaáreksturinn sé gríðarlegur.
Vigdís minnti á að tilboðið hafi komið Ara í opna skjöldu í gær. Hún geti ekki svarað því hvers vegna hann hafi ekki afþakkað strax, en Vigdís túlkar líka tilboðið til Ara sem eins konar friðþægingu eða „að gefa honum snuð“.
Vigdís er þó með aðra kenningu en Páll. Páll telur að þarna sé verið að kaupa frið frá Miðflokknum en Vigdís telur að samsærið sé dýpra en svo.
„Ég held að þetta sé langtum dýpra. Hildur er búin að tala um að það eigi að selja dótturfélög úr Orkuveitunni, það er Ljósleiðarann og Carbfix. Ég tel að Hildur sé að leika leik sem ég sé í gegnum. Leik að því leyti að það er búið að ráðstafa þessum tveimur dótturfélögum Orkuveitunnar til réttra aðila, innan gæsalappa, og Ari og Miðflokkurinn eiga að bera ábyrgð á þeirri sölu.“
„Er þetta gildra þá?“ hváði Heimir Karlsson þáttastjórnandi.
„Já, þetta er gildra,“ svaraði Vigdís og bætti við: „Þarna ætlar hún sér að skapa armslengd frá sjálfri sér og meirihlutanum til að láta fjórða flokkinn bera ábyrgð.“
Vigdís og Páll eru því á einu máli um að Ari Edwald ætti að afþakka boðið.
