Margt bendir til að íslenska mjólkin innihaldi hærra hlutfall sértaks prótíns en önnur mjólk sem gerir hana þar með heilsusamlegri. Hópur vísindamanna við Háskóla Íslands rannsakar um þessar mundir efnasamsetningu mjólkurinnar.
Margar tegundir prótína eru í mjólkinni og þau finnast í mismunandi hlutföllum eftir því hvaðan mjólkin er upprunnin. Rannsakendur skoða nú svokölluð A1 og A2 beta-casein prótín. Talið er að íslenska mjólkin sé ríkari af A2 prótínum en gengur og gerist.
Ólík prótín hafa ólík áhrif á meltinguna
Rannsóknin er hluti af doktorsverkefni Didar Farid Kareem Al-Shateri í matvælafræði við Háskóla Íslands. Rannsókninni er stýrt af Maríu Guðjónsdóttur, prófessor við matvæla- og næringarfræðideild Háskóla Íslands. Hún segir ólíka lögun og samsetningu prótínanna valda því að þau hafa ólík áhrif á líkamsstarfsemi. Þannig valdi A2-rík mjólk minni losun á sérstökum peptíðum í meltingarveginum en mjólk sem er A1-ríkari.
„Því eru líkur á því að við fáum minni meltingartruflanir við neyslu á íslenskri mjólk heldur en mörgum öðrum mjólkurtegundum,“ útskýrir María.
Um 20 ár frá síðustu rannsókn
Hún segir það tímabært að rannsaka innihald íslensku mjólkurinnar. Sambærileg rannsókn var síðast gerð fyrir um tuttugu árum og hún benti til þess að mjólkin væri A2-rík. Fáist sambærilegar niðurstöður í þessari rannsókn getur það haft talsverða þýðingu að sögn Maríu.
„Það gæti þýtt það einmitt að við getum nýtt efnasamsetningu mjólkurinnar hérna á Íslandi til að þróa heilsusamlegri mjólkurafurðir sem fara betur í maga. Þá er kannski stærra hlutfall neytenda sem getur nýtt sér þessi góðu næringarefni sem eru í íslensku mjólkinni.“
Sérfræðingar frá Matís og MS koma að rannsókninni
María segir hlutfall A1 og A2 prótína einnig hafa áhrif á vinnslueiginleika mjólkurafurða.
„Með því að rannsaka bæði efnasamsetninguna og hvaða áhrif það hefur á vinnslueiginleika þá skiljum við betur af hverju við fáum ákveðna eiginleika í osti og jógúrti og öðru sem er framleitt úr íslensku mjólkinni.“
Rannsóknin er flókin og að henni kemur fólk með mismunandi þekkingu, að sögn Maríu. Til viðbótar við vísindamenn úr Háskóla Íslands taka sérfræðingar frá Matís og Mjólkursamsölunni þátt í henni.
