Tékknesk stjórnvöld hafa hætt við áform um upptöku evru í bili. Ákvörðunin er ekki síst sögð pólitísk, frekar en að vera aðeins tekin á efnahagslegum forsendum.
Þegar Tékkland gekk í Evrópusambandið árið 2004 skuldbatt það sig til þess að taka á endanum upp evru, án þess þó að tiltaka sérstakan tímaramma. Núverandi gjaldmiðill, koruna, var tekinn upp árið 1993 þegar Tékkóslóvakíu var skipt upp í tvö ríki.
Í rúma tvo áratugi hafa stjórnvöld svo skilað árlegri skýrslu um þróun efnahagsmála og hvernig hagkerfið stendur samanborið við evrusvæðið - með fyrirhugaða upptöku evru í huga.
Andej Babis forsætisráðherra sem tók við völdum á ný eftir kosningar í haust, tilkynnti hins vegar á dögunum að slíku verði hætt á þeim rökum að upptaka evru verði hagkerfinu ekki til bóta og betra sé að hafa sjálfstæða efnahagsstjórn.
Möguleg upptaka evru, kostir þess og gallar, hefur verið þrætuepli í Tékklandi í mörg ár. Stóru fyrirtækin segja að mikið verði sparað með evrunni, að losna við íþyngjandi gjaldeyriskostnað, en greinendur hafa bent á að ákvörðun Babis sé ekki síður pólitísk.
Mesta fylgið fær hann frá öðrum en fyrirtækjaeigendum því flokkur hans höfðar meira til þjóðernissinnaðra kjósenda. Þeir séu miklu fleiri. Búist var við að samband Tékka við Evrópusambandið versnaði þegar Babis tók við völdum á ný, hann vill til að mynda draga úr stuðningi við Úkraínu og er dyggur stuðningsmaður Bandaríkjaforseta.
21 ríki hefur að fullu tekið upp evruna en Tékkland er eitt af sjö Evrópusambandsríkjum sem hafa ekki gert það.
Til þess að taka upp evru þurfa ríki að uppfylla svokölluð Maastricht-skilyrði, sem lúta meðal annars að verðbólgu, vöxtum, stöðugleika í gengismálum, afkomu hins opinbera og skuldum þess.
