Það tókst að vekja athygli umheimsins á hvalveiðum hér við land, segir aðgerðasinninn Paul Watson í viðtali við RÚV. Leiðangur skipsins Bandero hafi því gengið vel, þótt liðsmenn hands hafi verið handteknir og skip þeirra kyrrsett. Watson gerir þó athugasemdir við kyrrsetningu skipsins.
„Eitt af því sem þeir segja er að pappírarnir okkar hafi ekki verið í gildi en samt sem áður vorum við nýlega skráð í Panama og Brasilíu,“ segir Watson sem tekur fram að eftirlitsmenn á Írlandi hafi einnig farið yfir skipið áður en það kom til Íslands og lýst það sjóhæft.
„Lögfræðingar okkar verða í sambandi við hafnaryfirvöld á Íslandi á morgun til þess að útskýra hvað er í gangi,“ segir hann.
Vildu vekja athygli heimsins á hvalveiðum
„Partur af þessu var að vekja athygli fólks víðs vegar um heiminn á því sem er að gerast,“ segir Watson en erfiðlega gekk í fyrstu fyrir Bandero að finna hvalveiðiskipin. Watson segir það hafa verið sökum þess að Landhelgisgæslan gaf skipunum upplýsingar um staðsetningu Bandero. Því hafi ekki verið hægt að veitast beint að þeim.
„Á meðan gátu hvalveiðiskipin slökkt á sínum staðsetningarbúnaði, svo það var ein regla fyrir þá en önnur fyrir okkur,“ segir hann.
„Þú verður að skilja að tilgangurinn með öllu sem við gerum er að draga athygli fólks að því sem er að gerast.“
Vegna þessa hafi hann og áhöfn Bandero ákveðið að fara inn í 12 mílna lögsögu Íslands til að mæta hvalveiðiskipunum.
Watson segir að allir hafi vitað að koma myndi til handtöku og að löggæsla myndi fara um borð í Bandero. „Við gátum notað það til þess að breyta þessu í alþjóðlega frétt og fengum umfjöllun meðal annars á CNN og Sky News, sem beindi ljósi á málið,“ segir hann.
„Þú verður að skilja að tilgangurinn með öllu sem við gerum er að draga athygli fólks að því sem er að gerast. Þau geta kallað okkur hvað sem þau vilja en á síðustu 50 árum höfum við ekki slasað neinn og við höfum ekki verið sakfelld fyrir neina alvarlega glæpi og það er á fimmtíu árum af starfsemi og því tel ég að okkur gangi nokkuð vel,“ segir hann.
Enginn glæpur framinn núna eða í aðgerðinni 1986
Watson og samtök hans hafa verið gagnrýnd harðlega fyrir aðgerðir sínar, hér á landi og víðar, fyrir að reyna að stöðva atvinnustarfsemi sem skilgreind er lögleg á Íslandi. Einnig hefur áhöfn Bandero verið ásökuð um að hegða sér af gáleysi á hafi úti.
Watson segir að vel sé hægt að ásaka fólk en enn hafi enginn verið kærður. Enginn glæpur hafi heldur verið framinn þegar samtök hans sökktu tveimur hvalveiðiskipum í Reykjavík árið 1986.
„Vegna þess að ég gaf mig fram var engin ákæra, engin réttarhöld, engin sakfelling og því enginn glæpur,“ segir Watson.
„Við erum að sjá það sama núna, það er engin ákæra og því er enginn glæpur,“ segir hann. Þá telur hann einnig að brottflutningur áhafnar Bandero hafi ekki verið löglegur.
Watson hefur áður sagt í viðtali við RÚV, að engum yrði stefnt í voða við aðgerðirnar.
Sakamál er engu að síður til rannsóknar hjá lögreglunni á höfuðborgarsvæðinu. Ásgeir Þór Ásgeirsson, aðstoðarlögreglustjóri hjá lögreglunni á höfuðborgarsvæðinu, hefur áður sagt að ákæru sé ekki að vænta á næstunni en mikið af sönnunargögnum liggi fyrir.
Meðal annars að netadræsa hafi verið sett í skrúfuna á skipinu og að til sé af því myndbandsupptaka.
Watson segist ekki vita til þess að slíkt hafi verið gert en segir skipverja hafa verið að fylgja skipunum hans þegar átökin við hvalveiðiskipið, Hval 9, áttu sér stað. Þá segir hann að Bandero hafi ekki gert tilraunir til þess að klessa á hvalveiðiskipið.
Telur gögn hafa verið gerð upptæk án heimildar
Aðspurður hvort Watson eða samtök hans hafi verið beðin að afhenda gögn vegna þeirrar rannsóknar segir hann að lögreglan hafi einungis gert gögn upptæk.
„Þeir tóku þau án heimildar, þeir tóku tölvur og síma en það var engin heimild fyrir því,“ segir Watson. Þá tekur hann fram að áhöfn Bandero hafi ekki fengið lögfræðiaðstoð á meðan hún var yfirheyrð. „Við erum með lögfræðinga í vinnu á Íslandi og við sjáum hvert þetta fer,“ segir hann.
Watson bendir sjálfur á að samtökin hafi undir höndum ýmis sönnunargögn um brot hvalveiðiskipa á veiðum sínum á núverandi tímabili. Meðal annars eigi hvalveiðiskip að hafa notað fjóra sprengiskutla á einn hval sem hafi lifað í klukkutíma eftir að skotið var á hann en einnig að brotið hafi verið gegn umhverfisverndarlögum.
„En ríkisstjórnin á Íslandi gerir ekkert til þess að framfylgja reglum vegna þessara brota,“ segir Watson.
Unnið að því að fá Bandero til baka
Enn eru nokkrir áhafnarmeðlimir Bandero á Íslandi. Samkvæmt upplýsingum frá Helga Þorsteinssyni Silva, sem fer með mál áhafnarmeðlima í tengslum við brottflutning þeirra, hafa alls 15 verið fluttir af landi brott af 21.
Þeir sem eftir eru séu frá löndum með engu beinu flugi, líkt og Trínidad og Tóbagó, Brasilíu og Ástralíu. Beint flug sé þó nauðsynlegt til að framkvæmda megi brottflutning.
Ekki er lengur nægur mannskapur á landinu svo hægt sé að sigla skipinu Bandero af landi brott, jafnvel ef það væri dæmt sjóhæft. Watson segir að unnið sé að því að fá skipið til baka.
„En það er engin ástæða fyrir því að skipið sé stöðvað fyrir það eitt að fara inn í lögsögu Íslands og einnig báðum við um leyfi fyrir því en fengum ekki svar,“ segir hann.
Ætla að halda baráttunni áfram
Watson segir að hann og samtök hans muni halda áfram að berjast gegn hvalveiði á Íslandi.
„Ég vona að ef Ísland gengur í Evrópusambandið muni það verða endirinn, ESB mun ekki leyfa neinum aðildarríkjum að drepa hvali þar sem það gengur gegn lögum sambandsins,“ segir Watson sem tekur fram að þrátt fyrir að hvalveiðar séu löglegar á Íslandi séu þær ólöglegar samkvæmt alþjóðlegum lögum. Það hafi verið staðfest árið 2014 af alþjóðadómstólnum í Haag.
