Formaður Félags framhaldsskólakennara lýsir þungum áhyggjum af niðurskurði til framhaldsskólastigsins. Hann segir óraunhæft að halda uppi metnaðarfullu skólastarfi þegar meirihluti opinberra framhaldsskóla eru reknir með halla og sjá fram á enn frekari niðurskurð næstu fjögur árin.
„Það verður sífellt erfiðara að svara því hvernig við eigum að halda uppi metnaðarfullu skólastarfi þegar allt er skorið niður við trog endalaust,“ sagði Guðjón Hreinn Hauksson í Morgunútvarpinu á Rás 2.
Samkvæmt nýsamþykktri fjármálaáætlun á að skera niður til allra skólastiga og stjórnsýslu mennta- og barnamála næstu fjögur ár. Niðurskurður til framhaldsskóla nemur nærri 8% til ársins 2031.
„Þetta er eina skólastigið sem er jafnt og þétt skorið niður. Heildarframlög til á mann, til fræðslumála, hafa aukist í rauninni til allra skólastiga nema framhaldsskólastigsins, sem hefur lækkað um einhver 20% núna frá aldamótum,“ segir Guðjón.
Þetta sé þveröfugt við skilaboð stjórnvalda um stórsókn í menntamálum og að framlög á hvern nemanda hefðu í raun átt að hækka við styttingu námstíma til stúdentsprófs.
„Þetta gerðist einfaldlega ekki. Styttingin, sem einhvers konar hagræðingaraðgerð, tókst væntanlega hjá þeim en þetta var væntanlega ekki nóg.“
„Við getum engum úthýst“
Árið 2012 hafi 16 af 28 opinberum framhalddskólum verið reknir með halla og nú séu þeir orðnir 22. Guðjón segir ekki hægt að reka framhaldsskólana eins og hvert annað fyrirtæki því þeir þurfi að taka við öllum umsækjendum undir 18 ára aldri.
„Það er fræðsluskylda í landinu, við getum engum úthýst,“ segir Guðjón. „Við getum ekki boðið þeim upp á svona stórsókn sem er ekkert annað en niðurskurður. Þetta er stórsókn í orðum en í gjörðum er þetta bara niðurskurður.“
Að óbreyttu gæti þurft að loka bókasöfnum í skólunum, segja upp sálfræðingum og öðrum sem sinni nauðsynlegri stoðþjónustu og jafnvel skera niður fámennar námsbrautir.
„Ef við erum hér að reyna að fjárfesta í framtíð þá er þetta ekki leiðin til þess. Ef við ætlum okkur hér aukna hagsæld í okkar samfélagi eftir nokkur ár, hvernig stendur þá á því að við bjóðum upp á svona námsumhverfi?“
