Gagnaver hafa risið víðs vegar um land á undanförnum árum enda ákjósanlegar aðstæður á Íslandi fyrir uppbyggingu gagnavera. Mikil eftirspurn er eftir þjónustu þeirra, bæði innanlands og erlendis.
Nýverið tilkynnti atNorth um mikla stækkun á Akureyri, þar sem fjölga á byggingum úr 7 í 17 á næstu árum og svipaða sögu er að segja af starfsstöð þeirra á Reykjanesskaga. Áætlað er að uppbyggingin kosti um 100 milljarða króna.
„Það er gríðarleg eftirspurn eftir gagnaversplássi um allan heim. Við höfum fengið nokkra mjög góða viðskiptavini til Íslanda og gætum eflaust fengið fleiri ef meiri orka væri á lausu,“ sagði Eyjólfur Magnús Kristinsson, forstjóri atNorth.
Ekki bara uppbyggingin sem er kostnaðarsöm
Tölvubúnaðurinn sem hýsir gögn viðskiptavina gagnaveranna er gríðarlega kostnaðarsamur. Hver tölvuskápur getur kostað hundruði milljóna og hvert gagnaver hýsir tugi slíkra skápa.
Uppbygging mannvirkjanna er einnig kostnaðarsöm en af fyrirhugaðri 30 milljarða uppbyggingu á Akureyri er áætlað að byggingarnar tíu sem eftir á að reisa kosti um 12 milljarða.
Áhrifin mikil á hagvöxt í landinu
Að mati Jóns Bjarka Bentssonar, aðalhagfræðings Íslandsbanka, er áhrifa gagnavera á Íslandi þegar farið að gæta í hagtölum þjóðarinnar. Líkja megi áhrifum þeirra við þegar að Alcoa hóf uppbyggingu á álveri sínu á Reyðarfirði. Áhrifin eru jákvæð og þegar hafa gagnaverin aukið útflutningstekjur þjóðarinnar umtalsvert og þegar að þau verða komin í fulla starfsemi, eftir fyrirætlaða uppbyggingu, verði fyrst mikil hagvaxtaráhrif:
„Þau eru að verða alveg merkjanlegur hluti og allstór af útflutningstekjum þjóðarbúsins.
Við erum þegar farnir að sjá útflutningstekjur þjóðarbúsins aukast töluvert vegna þessarar uppbyggingar og auðvitað eru svæðisbundin áhrif, til dæmis í Eyjafirðinum af uppbyggingunni þar, þau eru umtalsverð,“ sagði Jón Bjarki Bentsson og bætti við:
Og hagvaxtaráhrifin verða í rauninni fyrst veruleg þegar gagnaverin eru komin í fulla starfsemi og fara þá að borga laun, innlendum aðilum, fara að kaupa þjónustu, fara að borga opinber gjöld og auðvitað raforkuna sem að skiptir líklega hvað mestu máli af þessum innlendu þáttum. Þannig við erum að tala þar um tugi milljarða sem að þetta bætir við þjóðarbúið. Bætir við landsframleiðsluna á hverju ári héðan í frá.
