Tveir ísraelskir hermenn særðust í skotbardaga í suðurhluta Líbanons í morgun þegar ísraelsk hersveit hitti fyrir vígamenn úr röðum Hezbollah-samtakanna.
Bæði Ísraelsher og Hezbollah hafa haldið árásum áfram þrátt fyrir vopnahlé sem tók gildi 17. apríl. Ísraelsher gerði í morgun loftárásir á fjölda bæja í Líbanon og hefur staðfesta herinn að tveir hermenn hafi særst í skotbardaga. Flogið var með þá á spítala.
Ísraelsher heldur einnig áfram að skipa íbúum líbanskra borga og bæja á brott. Meira en 1,2 milljónir eru á flótta í landi þar sem íbúar eru aðeins um 5,5 milljónir.
Ísraelsher hefur lagt undir sig nokkuð stórt landsvæði í suðurhluta Líbanons og margir Líbanar óttast að því verði ekki skilað aftur á næstunni.
Þá ýja ísraelsk stjórnvöld að því að árásir á Gaza hefjist aftur af fullum þunga. Þar hefur herinn lagt undir sig enn stærra svæði og útvíkkað þannig gulu línuna sem dregin var upp á kort þegar samið var um vopnahlé í október.
Samkvæmt heilbrigðisstofnunum á Gaza hefur Ísraelsher drepið að minnsta kosti 828 frá því að vopnahléið tók gildi.
Fellur í skuggann af öðrum átökum
Magnús Þorkell Bernharðsson, prófessor í nútímasögu Mið-Austurlanda sagði í samtali við fréttastofu í gær að alvarlega staða í Líbanon félli nokkuð í skuggann af átökum við Persaflóa.
„Það voru vissulega jákvæð teikn að ríkisstjórn Ísraels og Líbanons hittust í fyrsta skipti í 40 ár,“ sagði Magnús Þorkell. Hins vegar væru Hezbollah-samtökin ekki með í þeim samræðum. „Það er mjög slæmt.“
Sú staðreynd að Ísraelsk stjórnvöld leggja sífellt meira land undir sig segir Magnús að sé uppskrift að endalausu stríði og hernámi.
„Maður veit ekki alveg hvar þetta mun enda, að vera að færa landamærin alltaf fjær og fjær frá því sem þau voru upphaflega.“
