Heilbrigðisyfirvöld telja að þrír farþegar skemmtiferðaskipsins MV Hondius séu látnir af völdum Hantaveiru. Nokkrir til viðbótar hafa sýkst. Skipið var á siglingu milli Argentínu og Grænhöfðaeyja þegar veikindin komu upp.
Einn lést í skipinu, eiginkona hans liggur á sjúkrahúsi í Jóhannesarborg í Suður-Afríku og tæplega sjötugur Breti liggur þar á gjörgæslu með staðfest smit.
Alþjóðaheilbrigðisstofnunin segir að brugðist hafi verið skjótt við og að samstarf sé hafið við ríki um stuðning við læknismeðferð, brottflutning, rannsóknir og mat á lýðheilsuáhættu.
Í yfirlýsingu frá Hans Kluge, yfirmanni Alþjóðaheilbrigðismálastofnunarinnar í Evrópu, þakkar hann yfirvöldum í Suður-Afríku fyrir skjót viðbrögð. Þangað voru tveir farþegar fluttir og er annar þeirra látinn.
Sýkingar af völdum hantaveiru séu sjaldgæfar og tengist yfirleitt snertingu við sýkt nagdýr. Þótt sýking geti verið alvarleg þá smitist veiran ekki auðveldlega milli manna. Áhættan fyrir almenning sé áfram lítil og engin ástæða til að setja ferðatakmarkanir. Veikindi eins og þessi virði engin landamæri og sýni hversu mikilvæg samvinna milli ríkja í sé heilbrigðismálum.
