Landskjörstjórn telur báðar tillögur stjórnskipunar- og eftirlitsnefndar að orðalagi spurningar í þjóðaratkvæðagreiðslu um framhald aðildarviðræðna við Evrópusambandið skýrar, skiljanlegar og hlutlausar.
Nefndin óskaði umsagnar landskjörstjórnar um tvær tillögur að spurningu þar sem svarmöguleikar eru já og nei:
- Á Ísland að ganga til aðildarviðræðna við Evrópusambandið?
- Á Ísland að hefja á ný aðildarviðræður við Evrópusambandið?
Bryndís Haraldsdóttir, formaður stjórnskipunar- og eftirlitsnefndar, segir nefndina á síðasta snúningi um að skila utanríkismálanefnd sinni umsögn með nýrri tillögu að orðalagi. Hún segir líklegt að báðar tillögur verði sendar til utanríkismálanefndar, sem tekur lokaákvörðun um orðalag.
Landskjörstjórn gerði athugasemd við orðalag spurningarinnar samkvæmt þingsályktunartillögu um þjóðaratkvæðagreiðsluna. Samkvæmt henni var spurningin eftirfarandi:
„Á að halda áfram viðræðum um aðild Íslands að Evrópusambandinu?“ og svarkostirnir voru þessir:
„Já, halda áfram viðræðum um aðild Íslands að Evrópusambandinu“ og „Nei, ekki halda áfram viðræðum um aðild Íslands að Evrópusambandinu.“
Landskjörstjórn taldi orðalag spurningarinnar fela í sér þá forsendu að aðildarumsókn Íslands hafi ekki verið dregin til baka, en sagði þá forsendu umdeilda innan samfélagsins. Landskjörstjórn taldi því betra að spurningin yrði orðuð þannig að ekki fælist í henni afstaða til stöðu viðræðna Íslands við Evrópusambandið.
Ágreiningsefni hvort, hvernig og hvenær viðræðum var slitið
„Umræðan um það að hefja á ný eru augljóslega skýrari en það orðalag sem er í fyrirliggjandi þingsályktunartillögu en með því þá eru auðvitað meira að vísa í það þessar viðræður hófust á sínum tíma,“ segir Bryndís.
„Hin tillagan um að ganga til viðræðna við Evrópusambandið skilur það svolítið eftir og það er kannski það sem hefur helst verið til umræðu um ágreiningsefni hvort þeim var slitið, hvernig þeim var slitið og hvenær.“
Í umsögn sinni vegna nýju tilagnanna, sem skilað var 1. maí en birt á vef Alþingis í dag, segir að þær samræmist báðar þeim meginsjónarmiðum sem landskjörstjórn benti á í umsögn sinni til utanríkismálanefndar.
Telur sig geta sinnt kynningarskyldu þrátt fyrir skamman tímafrest
Stjórnskipunar- og eftirlitsnefnd óskaði einnig eftir upplýsingum tímasetningu atkvæðagreiðslunnar og hvernig landskjörstjórn hygðist standa að kynningu þjóðaratkvæðagreiðslunnar. Í umsögn landskjörstjórnar segir að hún hafi gert samning við Lagastofnun Háskóla Íslands um að vinna að kerð kynningarefnisins og sú vinna sé þegar hafin.
„Eins og fram kom í umsögn landskjörstjórnar til utanríkismálanefndar geta ýmsar áskoranir fylgt þjóðaratkvæðagreiðslu 29. ágúst nk. þar sem tímafrestir eru skammir. Landskjörstjórn telur sig engu að síður geta uppfyllt skyldu sína skv. 1. mgr. 52. gr. kosningalaga og staðið fyrir víðtækri kynningu á því málefni sem borið er undir þjóðaratkvæði.“
Fréttin var uppfærð með viðtali við Bryndísi Haraldsdóttur.
