Löggjafarþing Níkaragva hefur að skipun forsetans Daniels Ortega einróma samþykkt stjórnarskrárbreytingu sem takmarkar þátttöku stjórnarandstöðunnar í kosningum.
Þingforsetinn Gustavo Porras tilkynnti þetta í gær og hafði áður gefið til kynna að nýtt ákvæði stjórnarskrárinnar hefti framboð stjórnarandstæðinga sem Ortega álítur landráða- og valdaránsmenn á vegum Bandaríkjanna. Kjörtímabil forsetans var jafnframt lengt úr sex árum í sjö.
Ortega er áttræður og hefur stjórnað Níkaragva með harðri hendi síðan árið 2006 ásamt vara- eða samforsetanum Rosario Murillo, sem jafnframt er eiginkona hans.
Hann var einn leiðtoga Sandinista-hreyfingarinnar sem steypti einræðisherranum Anastasio Somoza af stóli 1979. Ortega réði lögum og lofum í landinu til 1990, þegar hann tapaði í kosningum og steig til hliðar.
Í júlí í sumar ákvað hann að banna allar kosningar í Níkaragva. Það vakti mikla fordæmingu um allan heim.
Stjórnarskrárbreytingin þykir nýjasta dæmið um hvernig þau hafa hert tökin á stjórn þessa Mið-Ameríkuríkis. Stjórnvöld í Bandaríkjunum hafa fordæmt fyrirætlanirnar ásamt Evrópusambandinu og Sameinuðu þjóðunum.
Ortega hefur í valdatíð sinni náð fullri stjórn á dómstólum, hernum og lögreglunni. Þúsundir hafa flúið Níkaragva frá því mótmæli gegn stjórnvöldum voru brotin á bak aftur af mikilli hörku árið 2018. Mörg hundruð voru drepin í þeim aðgerðum.
