Kviðdómur í máli Lindsay Clancy hefur ekki enn komist að niðurstöðu um sakhæfi hennar. Clancy er ákærð fyrir að hafa myrt þrjú börn sín árið 2023.
Málið hefur vakið töluverða athygli um allan heim og hafa milljónir hafa fylgst með réttarhöldunum í beinni útsendingu.
Kviðdómur tilkynnti dómara í dag að ekki hafi enn náðst að komast að niðurstöðum um sakhæfi Clancy. Dómari biðlaði þó til kviðdóms um að reyna áfram að komast að einróma niðurstöðu.
Ekki aðeins spurning um sekt eða sakleysi
Málið hefur ekki aðeins vakið spurningar um sekt eða sakleysi Clancy heldur einnig umræðu um geðheilbrigðisþjónustu nýbakaðra mæðra í Bandaríkjunum og hvort heilbrigðiskerfið hafi mögulega brugðist henni.
Clancy eignaðist þrjú börn með eiginmanni sínum Patrick Clancy: Coru, 5 ára, Dawson, 3 ára, og Callan, 8 mánaða. Eftir að yngsta barnið, Callan, fæddist í maí 2022 breyttist hegðun Clancy. Hún fann fyrir depurð og var kvíðin og leitaði hún sér hjálpar á sjúkrahúsi. Á fimm mánaða tímabili leitaði hún til ótal lækna sem skrifuðu upp á meira en 30 lyfseðla og 13 mismunandi geðlyf.
Hafi þjáðst af fæðingarþunglyndi og fæðingarsturlun
Tveimur mánuðum síðar, í janúar 2023, myrti Clancy þrjú börn sín og reyndi sjálf að svipta sig lífi. Lögmaður hennar neitar ekki að hún hafi myrt börnin, en heldur því fram að hún hafi á þeim tíma þjáðst af fæðingarsturlun og fæðingarþunglyndi. Af þeim sökum hafi hún því ekki verið fær um að greina rétt frá röngu.
Réttarhöldin hafa staðið yfir í um fimm vikur og von er á niðurstöðu kviðdóms á næstu dögum. Hægt er að hlusta á ítarlega umfjöllun um mál Clancy hér í spilaranum fyrir neðan.
