Náttúruverndarsamtökin Náttúrugrið hafa stefnt Mosfellsbæ og Veitum fyrir boranir sem hafa orsakað mengun í Varmá.
Friðlýst svæði
Snæbjörn Guðmundsson, formaður Náttúrugriða, segir svæðið einstakt.
„Það rennur heitt vatn út í ánna og blandast við kalt vatn, það skapar skilyrði fyrir lífríki sem við sjáum ekkert víða á Íslandi og þarna eru neðan við Varmárósa, ósar Varmár og Köldukvíslar sem rennur um Mosfellsdal, þar er friðlýst svæði og leirvogur og það er eitt af mikilvægari fuglasvæðum á Íslandi.“
Borvinna Veitna í Skammadal var stöðvuð í mars þegar borleir barst út í Varmá. Þær hófust á ný þegar Veitur töldu sig hafa bætt mengunarvarnir, en allt kom yfir ekki og stöðva þurfti framkvæmdir aftur. Nú eru þær hafnar enn á ný.
Náttúrugrið hafa stefnt Mosfellsbæ og Veitum og krefjast þess að framkvæmdaleyfi fyrir sjö borholum að Reykjum verði dæmt ógilt. Það verður tekið fyrir í næstu viku.
Skoða þurfi vistkerfi heildrænt
Snæbjörn segir að erfitt sé að meta umhverfisáhrif mengunarinnar þar sem vistkerfið hafði ekki verið skoðað áður en framkvæmdir hófust. Eftirlitsstofnanir þurfi að skoða vistkerfi heildrænt.
„Vistkerfi er ekki bara einhver pínulítill hluti af einni á, vatnið rennur svo niður þannig að ef það losnar leir á einum stað þá náttúrulega fer hann alla leið út í sjó.“
Hita upp stóran hluta húsa í Reykjavík
Silja Ingólfsdóttir, upplýsingafulltrúi Veitna, segir borholur á Reykjum og í Reykjahlíð mikilvægar því þær hiti upp stóran hluta húsa í Reykjavík.
Reynt sé að tryggja að náttúran fái að njóta vafans.
„Því við viljum auðvitað bora eftir heitu vatni fyrir hitaveituna á höfuðborgarsvæðinu í sátt við umhverfi og samfélag. Og við erum að bora þessa dagana í Skammadal og skolvatnið frá bornum fer ekkert út í læk eða á heldur er það látið renna aftur ofan í borholur á svæðinu.“
