Karlmaður hefur verið ákærður fyrir sérstaklega hættulega líkamsárás fyrir að hafa stungið mann fyrir utan Réttarholtsskóla í september 2024. Maðurinn var stunginn í vinstri síðu og mjöðm og hlaut skurð og yfirborðsáverka á úlnlið og hendi.
Þá veittist maðurinn að öðrum manni fyrir utan Mjóddina með járnröri þar sem hann sló manninn tvívegis í höfuðið með rörinu þannig að hann hlaut tvo opna skurði í hársverði.
Að lokum er maðurinn ákærður fyrir fíkniefnabrot fyrir að hafa haft 70 töflur af MDMA í vörslum sínum sem lögregla fann við leit á ákærða.
Vilja fimm milljónir í miskabætur
Brotaþolarnir tveir krefjast fimm milljóna króna samtals í miskabætur. Maðurinn sem varð fyrir árás fyrir utan Réttarholtsskóla krefst tveggja milljóna króna en hinn þriggja milljóna króna.
Sá síðarnefndi krefst þess einnig að viðurkennd verði skaðabótaskylda ákærða vegna líkamstjóns sem brotaþoli varð fyrir eftir árásina í Mjóddinni.
Er þess krafist að ákærði greiði brotaþola útlagðan sjúkrakostnað, sálfræðikostnað og annan kostnað vegna munatjóns að fjárhæð 250 þúsund krónur. Þá er einnig gerð krafa um þjáningabætur að fjárhæð 500 þúsund krónur.
