Öryggisverðir munu koma í stað bókavarða á þriðju og fjórðu hæð Þjóðarbókhlöðunnar kvölds og helgar þegar hausta tekur. Landsbókavörður segir ákvörðunina tekna í ljósi sparnaðarkröfu fjármálaáætlunar ríkisstjórnarinnar og jafnframt kröfu um bætta og sýnilegri öryggisgæslu.
Í stað bókavarða, sem hingað til hafa sinnt vaktgæslu, munu öryggisverðir sinna almennri vaktmennsku á þriðju og fjórðu hæð Landsbókasafnsins að kvöldi til og um helgar, en almennur bókavörður verður áfram til staðar á annarri hæð safnsins.
„Við erum með þessu að breyta samsetningu starfsfólks á kvöldin og um helgar til þess að bæta öryggi gesta og starfsmanna, að taka upp vaktmann, enda hefur komið fram almenn krafa í samfélaginu um að það ríki sýnileiki varðandi öryggi,“ segir Örn Hrafnkelsson landsbókavörður í samtali við mbl.is.
Fyrst og fremst vegna sparnaðarkröfu
Slíkar breytingar segir hann almenna þróun í bókasöfnum landsins, og hefur ekki áhyggjur af því að í breyttri samsetningu starfsfólks kunni að felast þjónustuskerðing fyrir gesti bókhlöðunnar.
Ákvörðunin sé þó fyrst og fremst til komin vegna 3,5% sparnaðarkröfu sem gerð var til safnsins í fjármálaáætlun ríkisstjórnarinnar, en sparnaðarkröfur á bilinu 2%-7,5% munu eiga við um allar stofnanir ríkisins.
„Sparnaðarkrafan er til dæmis 7,5% fyrir framhaldsskólana, og við erum lögð undir þessa sömu kröfu upp á 3,5%.“
Halda aftur af ráðningum nýrra starfsmanna
Breytt samsetning starfsmanna er ekki eina hagræðingaraðgerðin sem snert hefur starfsemi Landsbókasafnsins, en fyrir áramót tilkynnti Logi Einarsson, ráðherra menningar-, nýsköpunar og háskólamála, að safnið myndi sameinast Hljóðbókasafni Íslands og Kvikmyndasafni Íslands og að sameiginlegt safn yrði til húsa í Þjóðarbókhlöðunni.
Reynt verður að halda stöðum fastráðinna starfsmanna í sömu horfum að sögn Arnar þrátt fyrir að hlutastarfsmennirnir verði látnir fara. Haldið verði aftur af ráðningum nýrra starfsmanna.
„En þetta verður allt saman í góðum málum,“ segir hann að lokum.
