Það styttist í að nýr meirihluti verði kynntur en við höfum fengið nokkrar upplýsingar um hvað stendur til.
Meðal þess sem nýi meirihlutinn ætlar að gera er að auglýsa eftir vinnustöðum til samstarfs um rekstur leikskóla eða daggæslu, hefja samtal við ríkisstjórn og nágrannasveitarfélög um endurskoðun á samgöngusáttmála höfuðborgarsvæðisins, endurskoða deiliskipulag við Suðurlandsbaut og endurskoða breytingar á gatnamótum við Höfðabakka.
Breyta á skipulagi nýrra hverfa í Keldnalandi og Úlfarsárdal. Einnig á að hefja skipulag nýrra framtíðarhverfa á Kjalarnesi, Geldingarnesi, Gufunesi og Granda.
Sorphirða verður boðin út í einu hverfi í tilraunaskyni til undirbúnings þess að öll sorphirða borgarinnar verði boðin út. Lengja á opnunartíma sundlauga og kortleggja aðstöðumál íþróttafélaga auk þess sem tekjulágt eldra fólk fær 60 þúsund króna árlegan frístundastyrk
Í dag er ekki í fyrsta skipti sem tilkynnt er um meirihlutasamstarf í Viðey.
Davíð Oddsson, formaður Sjálfstæðisflokksins, og Jón Baldvin Hannibalsson, formaður Alþýðuflokksins, sigldu út í Viðey eftir þingkosningar 1991 og sömdu um að mynda saman ríkisstjórn. Sú fékk heitið Viðeyjarstjórnin vegna upprunans.
Viðeyjarstjórnin var við völd frá 1991 til 1995 og samdi meðal annars um aðild Íslands að evrópska efnahagssvæðinu. Hún var fyrsta ríkisstjórnin sem Davíð Oddsson myndaði og var upphafið að þrettán ára samfelldum ferli hans sem forsætisráðherra.
Jóhanna Vigdís Hjaltadóttir skrifar:
Meirihlutasamstarf Sjálfstæðisflokks, Viðreisnar og Framsóknarflokks er um margt sögulegt. Árið 1994 vann Reykjavíkurlistinn borgarstjórnarkosningar en að honum stóðu Alþýðuflokkur, Alþýðubandalag, Framsóknarflokkur, Samtök um kvennalista og Nýr vettvangur. Listinn fékk 8 af 15 borgarfulltrúum og fékk það þrennar kosningar í röð.
Árið 2006 vann Sjálfstæðisflokkur en það kjörtímabil skiptust á skin og skúrir og þrír meirihlutar voru í borgarstjórn á kjörtímabilinu.
Eftir kosningarnar 2010 komust félagshyggjuflokkar aftur til valda og hafa því verið nánast sleitulaust við völd í borginni í 32 ár.
Fjölmiðlamenn fóru um borð í Viðeyjarferjuna klukkan 10:45. Þeir verða fluttir frá Skarfabakka til Viðeyjar þar sem fundurinn verður, samkvæmt heimildum fréttastofu, haldinn úti. Líkt og sjá má á meðfylgjandi myndum er nokkuð grámóskulegt veður.
Í nýjum meirihluta verða tólf borgarfulltrúar. Meirihluti þeirra sat ekki í borgarstjórn á síðasta kjörtímabili.
Sjö af níu fulltrúum Sjálfstæðisflokksins eru nýir: Bjarni Guðjónsson, Brynjar Níelsson, Rúnar Freyr Gíslason, Guðný María Jóhannsdóttir, Albert Guðmundsson, Sigrún Ásta Einarsdóttir og Bjarni Fritzson.
Báðir fulltrúar Viðreisnar, Björg Magnúsdóttir og Róbert Ragnarsson, eru það einnig.
Aðeins Einar Þorsteinsson, oddviti Framsóknar, var áður í borgarstjórn auk Hildar Björnsdóttur og Ragnhildar Öldu Maríu Vilhjálmsdóttur. Þær sitja í borgarstjórn fyrir Sjálfstæðisflokkinn.
Þó að meirihlutar Sjálfstæðisflokks og Miðflokks annars vegar og Sjálfstæðisflokks, Viðreisnar og Framsóknarflokksins hins vegar hefðu haft jafn marga bæjarfulltrúa á bak við sig þá er talsverður munur á því hversu margir kusu þessa flokka.
Sjálfstæðisflokkurinn, Viðreisn og Framsóknarflokkurinn fengu samanlagt 50,5 prósent gildra atkvæða í kosningunum um þarsíðustu helgi. Sjálfstæðisflokkurinn og Miðflokkurinn fengu samanlagt 44,3 prósent atkvæða. Með Framsókn væru það 51,2 prósent.
Streymt verður frá blaðamannafundinum í Viðey í sjónvarpi og á ruv.is. Búist er við að hann hefjist klukkan rúmlega ellefu. Blaðamenn verða ferjaðir yfir í eyna klukkan 10:45.
Nýliðaþjálfun borgarfulltrúa fer fram í Ráðhúsinu í dag. Skiljanlega eru einhverjir borgarfulltrúar farnir að tínast af námskeiðinu eftir að tilkynnt var um nýtt meirihlutasamstarf.
Alls eru 16 nýir borgarfulltrúar að koma inn í borgarstjórn en námskeiðið er einnig fyrir fyrstu varamenn og starfsmenn borgarstjórnarflokka. Námskeiðið fer einnig fram á morgun og hinn en ljóst er að einhverjir missa af hluta úr fyrsta degi.
Hildur Björnsdóttir hefur skoðað samstarf með annað hvort Framsókn og Miðflokki eða Framsókn og Viðreisn að undanförnu.
Sé litið til svara úr kosningaprófi RÚV á Sjálfstæðisflokkurinn í Reykjavík mesta málefnalega samleið með Framsókn og Miðflokki. Viðreisn mældist nær flokkum á vinstri vængnum.
Björg Magnúsdóttir sagði í kappræðum RÚV fyrir kosningar að Viðreisn útilokaði samstarf við Miðflokkinn í borgarstjórn og því var ljóst að flokkarnir fjórir næðu ekki saman um meirihlutasamstarf.
Samkvæmt heimildum fréttastofu hefur náðst samkomulag milli Sjálfstæðisflokks, Viðreisnar og Framsóknar um myndun meirihluta í borginni.
Boðað hefur verið til blaðamannafundar fyrir hádegi til að kynna samstarfið. Fundurinn verður haldinn í Viðey.
Samkvæmt heimildum fréttastofu hefur Ari Edwald, oddviti Miðflokksins í Reykjavík, ekki rætt við Hildi Björnsdóttur, oddvita Sjálfstæðisflokksins, síðan á föstudaginn var.
Ekki hefur náðst í oddvita flokkanna enn sem komið er.
Hildur Björnsdóttir, oddviti Sjálfstæðisflokksins, hefur fundað með oddvitum Miðflokks, Viðreisnar og Framsóknar um mögulega meirihlutamyndun að undanförnu. Lítið hefur spurst af þeim samtölum og Hildur haldið spilunum þétt að sér.
Hildur stóð með pálmann í höndunum eftir kosningarnar sem fóru fram 16. maí síðastliðinn. Heimildir fréttastofu hafa hermt að Framsókn verði með í nýjum meirihluta hvort sem Sjálfstæðisflokkurinn myndaði meirihluta með Viðreisn eða Miðflokki.
Góðan dag. Við hefjum þessa fréttavakt til að fylgjast með þróun meirihlutaviðræðna í borginni. Samkvæmt heimildum fréttastofu mun myndin skýrast í dag um framhald þeirra.
