Mennta- og barnamálaráðuneytið hefur kynnt drög að reglugerð um notkun síma og snjalltækja í grunnskólum til umsagnar í samráðsgátt stjórnvalda. Reglugerðin hefur gengið undir vinnuheitinu „símafrí/símafriður í grunnskólum“.
Markmið reglugerðarinnar er að samræma reglur um notkun nemenda í grunnskóla á símum og snjalltækjum sem ekki eru í eigu eða umsjá skóla. Reglugerðin á að skapa námsfrið, stuðla að vellíðan, auknum félagslegum tengslum og jákvæðum skólabrag, styðja við faglegt skólastarf og efla einbeitingu og frammistöðu nemenda.
Engin samræmd reglugerð í gildi
Engin samræmd reglugerð um notkun síma- og snjalltækja í grunnskólum er í lögum um grunnskóla í dag. Hver og einn skóli ákveður reglur um notkun þeirra á skólatíma. Sumir skólar hafa tekið upp á því að banna notkun þeirra á skólatíma, margir með góðum árangri að eigin sögn.
Í drögunum eru hugtök tengd málefninu skilgreind og kveðið á um hvenær símar og snjalltæki séu heimil í skólastarfi, hvenær ekki, undanþágur þar á og viðbrögð við brotum á reglunum. Gert er ráð fyrir því að hver skóli móti sjálfur reglur um hvar eigi að geyma síma á snjalltæki á skólatíma.
Víða um heim virðast stjórnvöld finna sig knúin til að setja reglur um notkun barna og ungmenna á snjalltækjum og samfélagsmiðlum. Reglugerðin er að danskri fyrirmynd en Danir bönnuðu símanotkun í grunnskólum á síðasta ári. Þá bönnuðu Ástralir notkun ungmenna á samfélagsmiðlum í fyrra og forsætisráðherra Bretlands tilkynnti í dag áform um hið sama.
Mennta- og barnamálaráðuneytið hefur boðið 26 stofnunum og samtökum að senda inn umsögn um drögin að reglugerðinni. Öllum er frjálst að senda umsögn og fimm hafa þegar gert það.
Áhyggjur af börnum með sykursýki
Nokkrar umsagnir lúta að áhyggjum af áhrifum reglnanna á börn með sykursýki af tegund 1. Í drögunum er gert ráð fyrir undanþágum vegna stuðningsþarfa nemenda og heilsufarsástæðna. Samtökin Diabetes Ísland telja meðal annars mikilvægt að það komi skýrar fram að undanþágan nái til barna sem nota samfellda blóðsykursmæla og insúlíndælur sem tengjast snjallsímum.
Aðrir setja fram athugasemdir við að ráðuneytið blandi sér í daglega starfsemi skóla. Skólarnir hafi ekki verið í vandræðum með að setja reglur um símanotkun sjálfir. Það sé ekki töfralausn fyrir líðan barna og ungmenna að banna síma í skólum.
Drögin kveði á um að aðeins skólastjóra sé heimilt að veita undanþágur frá reglunum og af orðalagi sé ekki ljóst hvort honum sé heimilt að gefa kennurum umboð til að veita undanþágur. Þá sé það einnig vandkvæðum bundið ef geyma á síma í þar til gerðum skápum ef skóladegi lýkur annars staðar en þar sem hann hófst, til dæmis í sundi. Einnig þurfi að skýra undanþáguákvæði fyrir símanotkun í frístundastarfi.
