Össur Skarphéðinsson, fyrrverandi þingmaður og ráðherra Samfylkingarinnar, hristi aðeins upp í umræðunni á Facebook í gærkvöldi eftir umræðuþátt RÚV þar sem frambjóðendur til borgarstjórnar Reykjavíkur mættust í beinni útsendingu.
Össur varpaði fram þeirri spurningu hvort Hildur Björnsdóttir, oddviti Sjálfstæðisflokks, gæti stjórnað borginni.
„Vægðarlausir spyrlar RÚV tóku Hildi Björnsdóttur engum vettlingatökum í upphafi framboðsþáttarins í kvöld,” sagði Össur og bætti við að þeir hefðu rifjað upp að undir stjórn hennar hafi borgarstjórnarflokkur Sjálfstæðismanna logað af sundurlyndi.
„Í stórum málum eins og Borgarlínu klofnaði flokkurinn í þrennt, og farsanum lauk svo með því að þrír borgarfulltrúar gáfust upp á Hildi og gengu til liðs við annan flokk,” sagði Össur sem á þar við Helga Áss Grétarsson, Kjartan Magnússon og Mörtu Guðjónsdóttur.
Össur sagði svo:
„Þessari blóðhráu upptalningu gat vitaskuld ekki lokið með öðru en eftirfarandi spurningu: „Afhverju ættu borgarbúar að geta treyst því að flokkurinn geti stjórnað borginni?”
Össur segir að þetta sé kjarni málsins og flokkur sem geti ekki stjórnað sjálfum sér geti ekki stjórnað borginni.
„Hildur Björnsdóttir býr að sönnu yfir þeim fágæta hæfileika að geta rutt út úr sér fleiri orðum á mínútu en nokkur núlifandi Íslendinga – þannig að mann sundlar stundum undir! En er það trúverðugt að stjórnmálamaður sem ekki getur einu sinni stjórnað sex manna borgarstjórnarflokki sé endilega best fallin til að stjórna Reykjavík?“
Sitt sýndist hverjum um þessi orð Össurar og voru stuðningsmenn Sjálfstæðisflokksins og aðrir sem voru honum ósammála fljótir að bregðast við.
„Þurfti ekki að kalla til vinnustaðasalfræðing i 6 manna þingflokk Samfylkingarinnar fyrir ekki svo löngu? Það hafa verið gerðar ansi miklar breytingar á sveit Sjálfstæðisflokksins fyrir þessar kosningar og léttleikinn umtalsvert meiri en áður,” sagði Sigurður Kári Kristjánsson, fyrrverandi þingmaður Sjálfstæðisflokksins.
„Óttaleg örvænting er þetta hjá þér fóstri minn,“ sagði Þorsteinn Sæmundsson, fyrrverandi þingmaður Framsóknarflokksins og Miðflokksins.
„Já hún getur það og það veistu,“ sagði Guðfinna Jóhanna Guðmundsdóttir, fyrrverandi borgarfulltrúi.
„Munurinn á Hildi og 1. manni á lista Samfylkingarinnar í umræðunum í kvöld var sá,að Hildur brilleraði á meðan frammistaða Péturs Marteinssonar var brjóstumkennanleg,“ sagði Jón Magnússon sem sat meðal annars á þingi fyrir Sjálfstæðisflokkinn og Frjálslynda flokkinn.
„Æji Össur, þetta er gömul fjölmiðlasaga sem lifir gömlu gróulífi. Þú ert of mikill til að taka þátt í þessu,“ sagði síðan lögmaðurinn Gísli Kr. Björnsson. Aðrar athugasemdir voru í svipuðum dúr: „Vandræðalegt og desperat komment hjá þér,“ sagði veitingamaðurinn Sölvi Snær Magnússon og Ragnheiður Ríkharðsdóttir, fyrrverandi þingkona Sjálfstæðisflokks, sagði:
„Elsku Össur, bíðum bara og sjáum hvað kemur upp úr kjörkössunum. Stjórnartíð Samfylkingar í borginni hefur nú ekki verið neinn dans á rósum.“
