Utanríkisráðherra Írans er kominn til Pakistan og erindrekar Bandaríkjastjórnar eru sagðir á leiðinni þangað til friðarviðræðna. Talsmaður utanríkisráðuneytis Írans segir þó enga beina fundi milli Írans og Bandaríkjanna á dagskrá, líkt og Bandaríkjaforseti hafði sagt í gær. Átta vikur eru síðan Bandaríkin og Ísrael hófu árásir á Íran.
Alls er óljóst hvort verði af friðarviðræðum milli Bandaríkjanna og Írans í Pakistan í dag. Abbas Araghchi, utanríkisráðherra Írans, kom til Pakistan í morgun og fundaði með yfirmanni pakistanska hersins. Araghchi sagðist næst ætla að ferðast til Óman og Rússlands og sagði í færslu á samfélagsmiðlum að markmiðið væri að ráðfæra sig um þróun mála í heimshlutanum.
Talsmaður utanríkisráðuneytis Írans sagði Araghchi aðeins hitta hátt setta pakistanska embættismenn og að engin plön væru um beint samtal milli Írans og Bandaríkjanna.
Í yfirlýsingu að loknum fundinum með yfirmanni pakistanska hersins sagði Araghchi að þeir hefðu rætt þróun mála varðandi vopnahléið milli Írans og Bandaríkjanna. Hann hefði einnig deilt skoðunum og sjónarmiðum íranskra stjórnvalda varðandi að binda endi á stríðið.
Araghchi sagðist einnig hafa fundað með Shehbaz Sharif, forsætisráðherra Pakistans, og útskýrt afstöðu Írans um vopnahléið. Hann sagði Sharif vera vissan um að samningaviðræður haldi áfram.
Von er á Steve Witkoff, sérstökum erindreka Bandaríkjastjórnar í Mið-Austurlöndum, og Jared Kushner, tengdasyni Donalds Trumps Bandaríkjaforseta, til Islamabad, höfuðborgar Pakistans í dag.
Varaforsetinn, JD Vance, er sagður á hliðarlínunni, tilbúinn að taka þátt í viðræðunum. Samkvæmt upplýsingum frá Hvíta húsinu ætla Witkoff og Kushner að taka þátt í viðræðum við fulltrúa írönsku sendinefndarinnar.
