Viðskiptaráð hefur birt greiningu á skýrslu mennta- og barnamálaráðuneytisins um námsárangur nemenda í grunnskólum og framhaldsskólum á höfuðborgarsvæðinu
Skýrslan sýnir mikinn mun á því hve hátt hlutfall nemenda lýkur framhaldsskóla eftir því úr hvaða grunnskóla þeir útskrifast. Hlutfallið er hæst í Smáraskóla, 96%, en lægst í Fellaskóla, 25%.
Ennfremur er það niðurstaða Viðskiparáðs að ósamræmi sé í einkunnagjöf milli grunnskóla. Er sú ályktun dregin af samanburði á árangri í framhaldsskóla nemenda með sambærilegar einkunnir úr mismunandi grunnskólum:
„Gögnin sýna annars vegar nemendur geta fengið mismunandi grunnskólaeinkunnir en síðar náð sambærilegum árangri í framhaldsskóla. Hins vegar sýna þau að nemendur með sömu grunnskólaeinkunn geta síðar náð afar misjöfnum árangri í framhaldsskóla.“
Það er niðurstaða Viðskiptaráðs að velgengni nemenda ráðist í auknum mæli af því hvaða grunnskóla þeir hafa sótt en síður af getu þeirra:
„Þessi munur bendir til þess að nemendur búi við afar ólík tækifæri í grunnskólakerfinu. Að óbreyttu er hætta á að grunnskólakerfið þróist áfram í átt að félagslega aðgreindum skólum þar sem búseta og grunnskóli hafa ráðandi áhrif á framtíðarmöguleika barna. Það dregur úr félagslegum hreyfanleika og grundvallarsjónarmiði um jafnræði í grunnskólakerfinu.“
Samræmdir mælikvarðar nauðsynlegir
Viðskiptaráð segir gögnin sýna nauðsyn þess að taka upp samræmda mælikvarða við lok grunnskóla og að framhaldsskólum verði heimilt að taka mið af þeim við innritun nýnema. Þannig megi stuðla að því að nemendur séu metnir á sambærilegum forsendum, óháð því hvaða grunnskóla þeir sækja. Ennfremur segir:
„Jafnframt er nauðsynlegt að greina betur ástæður þess að svo mikill munur er á námsárangri og útskriftarhlutfalli milli grunnskóla. Meginmarkmið skólakerfisins hlýtur að vera að tryggja öllum börnum jöfn tækifæri, óháð búsetu eða bakgrunni.
Framtíðartækifæri barna eiga ekki að ráðast af því hvaða grunnskóla þau sóttu heldur getu þeirra og árangri. Samræmdir mælikvarðar, aukin gagnasöfnun og markvissar úrbætur eru forsenda þess að tryggja jafnræði innan menntakerfisins á ný.“
Sjá nánar hér.
