Lögregluyfirvöld í Kósóvó handtóku níu Serba í norðurhluta Kósóvó í gær vegna gruns um stríðsglæpi sem þeir eiga hafa framið á tíunda áratugnum.
Tvær fjöldagrafir fundust í bænum Zubin Potok í norðurhluta Kósóvó í sumar, en í þeim voru líkamsleifar 23 einstaklinga. Talið er að þar sé að finna líkamsleifar Albana frá Mitrovica, þar á meðal lækna, prófessora og mannréttindabaráttufólks, sem hurfu í apríl 1999. Búið er að bera kennsl á líkamsleifar þriggja úr þessum hópi.
Lögreglan í Kósóvó og embætti sérstaks saksóknara staðfestu í gær að handtökur á níumenningunum tengdust hvarfi fólksins, en engar frekari upplýsingar voru gefnar upp um hina handteknu.
Áður höfðu þrír verið handteknir vegna gruns um að tengjast málinu.
Grunur leikur á að fjöldagröfin sé frá tímum Kósovóstríðsins milli hers Serbíu og Svartfjallalands og frelsishers Kósovó-Albana seint á 10. áratugnum. 13.000 voru drepnir í átökunum og 4.000 var saknað þegar stríðinu lauk.
