Í Moskvu hefur fátt bent til þess að þingkosningar hafi verið haldnar um helgina. Engir kosningafundir, engar myndir af frambjóðendum, aðeins eitt og eitt veggspjald til að minna á kosningahelgina enda margir lítt meðvitaðir um að það séu þingkosningar í gangi.
Eftir að eina flokknum sem lýsti andstöðu við stríðið var bannað að bjóða sig fram er fátt sem bendir til annars en að Sameinað Rússland, flokkur Pútíns forseta, haldi góðum meirihluta á Dúmunni, neðri deild rússneska þingsins.
Andstæðingar forsetans segja kosningarnar sýndarleik. Stjórnin hvetji kjósendur til að kjósa rafrænt sem auðveldara sé að hagræða en kjörseðlunum sem koma upp úr kössunum. Fyrir utan kjörstað sem Jón Björgvinsson fréttamaður RÚV fór á um helgina voru það aðeins fylgjendur Pútíns sem ekki óttuðust að tjá sig.
„Við stöndum með Pútín, forseta okkar. Við svíkjum hann ekki á sama hátt og Vesturlöndin gera,“ sagði einn kjósenda.
Þátttaka í rússneskum þingkosningum fer sjaldan yfir 60 prósent og Edward er einn af þeim sem telja það þjóna litlum tilgangi að kjósa. Þessi 48 ára gamli hermaður fór í stríðið í Úkraínu í þeirri trú að hann ætti að berjast þar við nasista en kom bæði særður og vonsvikinn til baka.
„Það er sama þótt núverandi þingmenn verði endurkjörnir eða nýir komi í þeirra stað. Þeir hafa aldrei gert neitt til að gera líf okkar bærilegra. Miðað við það sem ég heyri óttast
ég að við séum á barmi mikilla átaka. Stríðið mun aðeins magnast. Þeir sem styðja þessi átök ættu að fara og reyna það sjálfir hvernig það er að vera á vígvellinum. Þetta ástand hefur bara steypt okkur í skuldir og hvaðeina,“ segir Edward.
Stjórnvöld í Moskvu reyndu allt til að sýna fram á góða kosningaþátttöku nú um helgina, jafnvel með peningagjöf til þeirra sem kjósa, meðvituð um þetta almenna áhugaleysi þegnanna hér sem töldu niðurstöðu þessara rússnesku þingkosninga fyrir fram gefna.
