Atlantshafsbandalagið tilkynnti í gær að sendur verði liðsauki til Svartahafs vegna drónaárása á flutningaskip úti fyrir ströndum Búlgaríu og Rúmeníu undanfarið. Sex drónaárásir hafa verið gerðar þar á síðustu tíu dögum.
Árásirnar hafa beinst að flutningaskipum sem sigla með korn og landbúnaðarvörur frá Úkraínu. Að minnsta kosti 23 er saknað eða hafa verið drepnir í árásunum.
Bandalagsþjóðir NATO ætla að leggja til eftirlitsflugvélar á sjó, ratsjárkerfi, sprengjuleitarteymi, leyniþjónustuteymi, dróna og fleira að Svartahafi. Ekki hefur þó verið tilgreint hvaða bandalagsþjóðir ætla að senda liðsauka.
Áður hafði forsætisráðherra Búlgaríu, Rumen Radev, greint frá því að bandarískar P-8 Poseidon herflugvélar hefðu hafið eftirlit við Svartahaf.
Kaja Kallas, utanríkismálastjóri Evrópusambandsins, sagði í gær að sex árásir á tíu dögum með meintum rússneskum drónum markaði hættulega og óásættanlega stigmögnun.
The Guardian segir að yfirvöld í Rúmeníu hafi skráð 35 óleyfilegar drónaárásir það sem af er þessu ári, samanborið við níu árið 2025. Þá hefur rúmenski herinn skotið niður sex dróna á þessu ári en engan á síðasta ári.
