Ferðamönnum sem lögðu leið sína til Bandaríkjanna fækkaði í fyrra á milli ára, þótt þeir hafi aldrei verið fleiri á heimsvísu. Samdrátturinn nam rúmum fimm prósentum. Margir vona að HM í fótbolta laði ferðamenn til landsins en þar er sá hængur á að miðaverð þykir svimandi hátt. Fjármálaráðgjafi segir að það sé mun hærra en knattspyrnuáhugafólk um allan heim eigi að venjast.
Ferðamönnum fækkað um rúmlega 5 prósent
Ferðaþjónustufyrirtæki í sólskinsríkinu Flórída fara ekki varhluta af fækkun ferðamanna. Elina Weisberg, eigandi Gator Park, segir gestum frá Evrópu og Kanada snarfækka. „Um 30-50 prósent.“
Kevin Rust er kráareigandi. Hann segir reksturinn finna fyrir Trump-lægðinni, eins og hann orðar það.
„Ég get sagt ykkur að nú finnum við fyrir Trump-lægðinni vegna stefnumála hans og stríðsins sem hann efndi til. Allt þetta hefur hamlað og hægt á okkar rekstri. Ég held að við værum ekki í þessari stöðu hefði hann ekki gert bandamenn og vini afhuga okkur.“
Á landsvísu fækkaði ferðamönnum um 5,4 prósent. Samkvæmt tölum frá Kanada fækkaði Bandaríkjaferðum Kanadamanna um 25 prósent í fyrra.
„Þetta er allt annað en knattspyrnuáhugafólk alþjóðlega hefur átt að venjast“
Margir binda vonir við að HM í fótbolta, sem fer fram í Bandaríkjunum, Mexíkó og Kanada, laði ferðamenn til landsins. Mótið hefst 11. júní og lýkur með úrslitaleik á MetLife-leikvanginum í New Jersey 19. júlí.
Skipuleggjendur heimsmeistaramótsins hafa verið harðlega gagnrýndir fyrir himinhátt miðaverð á leiki. Gianni Infantino, forseti alþjóðaknattspyrnusambandsins, FIFA, blæs á gagnrýnisraddir.
„Þið hafið heyrt mikla umræðu um miðasölu á HM. Það eru til dýrir miðar, já, en líka á viðráðanlegu verði.“
Björn Berg Gunnarsson fjármálaráðgjafi segir miða á leikina flesta dýrari núna en áður. „Þeir eru miklu, miklu dýrari. Að jafnaði getum við sagt, það fer aðeins eftir því hvenær er verið að leika þessa leiki, þeir eru svona frá tvöfalt dýrari til fjórum sinnum dýrari en á fyrri mótum.“
Erfiðara sé að fá miða í ódýrustu verðflokkunum. „Þannig að flestir sem ætla að sækja þetta mót munu þurfa að kaupa dýrari svæði, eða dýrari miða yfir höfuð, en þeir hefðu keypt á síðustu mótum þannig að þetta er margfalt, margfalt dýrara en áður.“
Viðmiðin eru önnur núna en á fyrri mótum og Björn segir verðlagninguna ekki óeðlilega miðað við Norður-Ameríku.
„Þetta er allt annað en knattspyrnuáhugafólk alþjóðlega hefur átt að venjast. Það er ekki dýrara að sækja úrslitaleikinn á HM en að sækja Ofurskálarúrslitaleikinn í bandaríska ruðningnum. En við þekkjum þetta bara ekki úr fótboltanum.“
Engin meiriháttar jákvæð eða neikvæð efnahagsleg áhrif af svona mótum
Hann segir heimamenn eiga eftir að mæta á flesta leikina en nú reyni á hvort alþjóðlegir aðdáendur láti bjóða sér þetta verð.
Nærri áttatíu prósent hótelbókana í borgunum þar sem leikirnir fara fram eru undir væntingum, samkvæmt nýrri skýrslu Samtaka hótel- og gistihúsaeigenda í Bandaríkjunum.
Björn bendir á að heildarkostnaður sé hár, ekki aðeins miðaverðið. Flugfargjöld séu há, dýrt sé að koma sér á milli staða og gisting dýr. Pólitísk áhrif séu einnig mikil.
„Þetta mót var í raun og veru keypt af FIFA og til þess að útreikningarnir yrðu eins glæsilegir og þeir voru lögðu fram með þá hefði allt þurft að ganga upp. Það virðist bara ekki allt vera að ganga upp.“
Infantino hefur sagt áhorfendur eiga von á 104 Ofurskálaleikjum á mótinu. Þátttökuþjóðum var fjölgað í 48 og alls verða 104 leikir spilaðir á mótinu.
„Það er ekkert í dag sem bendir til þess að við séum að fara að sjá 104 Ofurskálaleiki, ekkert sem bendir til þess. Það er samt aldrei að vita. FIFA kann þetta. Bandaríkin kunna þetta. En ég held að væntingar þeirra til mótsins þurfi nú aðeins að dempast fram að mótinu.
„Það sem skiptir öllu máli núna fyrir þau er að fylla vellina, er að koma fólki þangað, sjá til þess að það verði leyst úr vandamálum varðandi vegabréfaáritanir, varðandi alla þessa pólitísku þætti sem fylgja þessu móti, þannig að FIFA, Bandaríkin, Kanada og Mexíkó geti einbeitt sér að því að fagna mótinu, kynna þetta sem meiri háttar partí og sýningu.“
Björn Berg telur ekki víst að það verði varanlegur ávinningur af því að halda svona mót. „Það verða engin meiriháttar jákvæð eða neikvæð efnahagsleg áhrif af því að halda þetta mót. Þetta er partý, það kostar fullt af peningum, auðvitað vonum við að þetta gangi vel en þetta er ekki að fara að breyta neinu í stóra samhenginu.“
