Hanna Katrín Friðriksson atvinnuvegaráðherra segir að varanlegar undanþágur séu í boði þegar ríki sækja um aðild að Evrópusambandinu.
„Þær eru í boði, aðrar þjóðir hafa fengið slíkt. Það heitir sérlausnir en ekki varanlegar undanþágur. Aðrar þjóðir hafa fengið þær á þeim sviðum sem varða þær mestu. Það sem stjórnvöld leggja grundvallaráherslu á,“ sagði hún í Vikulokunum á Rás 1 í dag.
Hanna Katrín segir að ríkisstjórnin hafi lýst því yfir að í aðildarviðræðum yrði lögð áhersla á sjávarútvegsmál, byggðamál og landbúnað. „Orkumálin eru líka gríðarlega mikilvæg. [...] Við höfum sagt þetta ítrekað. Þetta eru stóru málin.“
Telur ráðherra ofmeta stöðuna
„Ég held að Hanna Katrín og Þorgerður Katrín [Gunnarsdóttir utanríkisráðherra] ofmeti svolítið mikið hvaða Evrópusamband við erum að tala um,“ segir Orri Hauksson, verkfræðingur og fjárfestir, sem einnig var til viðtals í þættinum.
Orri segir alla sem vilja kynna sér Evrópusambandið vita hvað það er. „Og það að við göngum inn í eitthvað allt annað fyrirkomulag – eða Evrópusambandið gangi eiginlega í Ísland því við ætlum að hafa eigin sjávarútvegssvæði held ég að sé ofmat.“
Þorsteinn Guðmundsson, leikari og sálfræðingur, var einnig gestur Vikulokanna.
Hann sagðist sakna þess að heyra meira um aðrar atvinnugreinar og áhrif mögulegra aðildarviðræðna á þær.
„Það er mikið talað um landbúnað og sjávarútveg. Hvað með til dæmis listir? Hvað með kvikmyndir?“ spyr hann. Þá segist hann sakna þess að vita hver áhrif yrðu á alþjóðsamstarf og heilbrigðiskerfið.
Hanna Katrín tók undir þetta. Hún segir að mikill fókus hafi verið á landbúnað og sjávarútveg. „Því þar eru gríðarlega sterk hagsmunaöfl,“ segir hún. „Þannig að annað kemst eiginlega ekki að.“
Hún benti hins vegar á að lægri vextir og umsýslukostnaður ríkisins myndi vera góður fyrir atvinnugreinar í landinu.
