Norski krónprinsinn Hákon Magnús hefur stytt opinbera heimsókn sína til Japans og heldur heim þar sem lungnasjúkdómur eiginkonu hans, Mette-Maritar krónprinsessu, lungnatrefjun, hefur ágerst og hugnast krónprinsinum ekki að vera svo fjarri heimahögunum eins og nú er komið.
Eins hefur Ingrid Alexandra prinsessa ákveðið að gera hlé á námi sínu í stjórnmálahagfræði og alþjóðasamskiptum við Háskólann í Sydney í Ástralíu og koma heim til Noregs til að vera móður sinni til halds og trausts.
„Þetta er sjúkdómur í þróun og því miður hefur hann orðið henni þyngri,“ sagði Hákon þegar hann ávarpaði norska og japanska blaðamenn í Tókýó í dag. Til stóð að hann dveldist í Japan í fjóra daga en síðasti dagur heimsóknarinnar fellur nú niður vegna ástands krónprinsessunnar.
Engin lækning finnst
Lungnatrefjun (e. pulmonary fibrosis) lýsir sér með því að trefjaríkur bandvefur tekur að myndast í lungum sjúklingsins sem torveldar öndun með þeim afleiðingum að loftskipti í lungum skerðast.
Þótt engin lækning finnist enn við lungnatrefjun er unnt að bæta líðan sjúklingsins og lífsgæði, svo sem með því að gefa trefjalyf sem hægja á örmyndun auk bólgueyðandi lyfja og súrefnisgjafar. Í alvarlegustu tilfellum getur lungnagjafar orðið þörf.
„Ég bið alla, sem til stóð að ég heimsækti síðasta daginn, afsökunar en nú ríður á að ég komi mér heim og sé hjá Mette-Marit. Henni er þyngt um þessar mundir svo það er það sem ég vil gera,“ sagði krónprinsinn.
Ástand krónprinsessunnar er nú komið á það stig að hún þurfti öndunaraðstoð þegar hún hitti börn í árlegri skrúðgöngu í Ósló á þjóðhátíð Norðmanna 17. maí.
Sló á létta strengi þrátt fyrir allt
Hákon vildi ekki svara spurningum um hvort Mette-Marit væri á leið á biðlista fyrir lungnaígræðslu. „Það er læknisfræðileg spurning,“ sagði hann, „læknarnir hafa sínar verklagsreglur og þeir skulu fá að vinna sína vinnu til hlítar og í réttri röð,“ sagði hann.
Krónprinsinn sló þó þá létta strengi á blaðamannafundinum þegar hann ræddi muninn á Noregi og Japan.
„Þegar hér er nótt er dagur heima. Tungumálin okkar eru gerólík og maturinn líka sem ég verð að segja að er mjög góður hér. Japan, með sínar 120 milljónir íbúa, hefur gert það að listformi að búa þétt, í Noregi, þar sem fimm milljónir búa [5,65 milljónir] getur næsti nágranni verið í kílómetra fjarlægð. Japanskar lestir eru líka alltaf á áætlun. Norskar lestir eru það líka – svona oftast,“ sagði Hákon á blaðamannafundinum í Japan.
