Ónafngreindan mann í Rebild á Jótlandi rak í rogastans þegar hann var að grafa fyrir undirstöðum sólpalls við húsið sitt og kom niður á silfursjóð frá tímum víkinga, mikinn að vöxtum.
Danska ríkisútvarpið hefur eftir sérfræðingum Þjóðminjasafns Norður-Jótlands að sjóðurinn vegi um 18,5 kílógrömm. Það er þrefalt meira en stærstu sjóðir sem hingað til hafa fundist og hann geymir á áttunda hundrað silfurmuna eða -brota.
Þar á meðal eru 47 arabískar myntir, myndir af hamri Þórs og krossum sem sýni að sjóðurinn varð til meðan ásatrú og kristni voru bæði við lýði.
Einstakur fornleifafundur
Torben Sarauw, forstöðumaður varðveisludeildar menningararfs á safninu, segir silfursjóðinn algerlega einstakan, bæði að efni og umfangi. Hann útskýri jafnvel hvers vegna fólk nútímans er eins og það er.
Lars Christian Nørbach, forstöðumaður safnsins, segir fundinn mikil tíðindi vegna fjölda muna og ekki síður frá sögulegu sjónarmiði og mikilvægi fyrir fornleifarannsóknir. Mikil vinna er fram undan enda fjölmörgum spurningum um uppruna silfursjóðsins ósvarað. Kenningar eru uppi um að hann tengist talsvert minni sjóði sem fannst 1971.
Nørbach segir leit þegar hafna að byggingum sem gætu varpað ljósi á þá sem sjóðinn áttu. Hvað sem því líði bæti silfrið miklu við þekkingu manna á sögu Norðurlandanna, slíkir sjóðir sýni hvert víkingarnir ferðuðust, hvar þeir komu höndum yfir verðmætin og upplýsi jafnvel almennt um efnahag þeirra.
