Bresk lögregla hefur handtekið mann, Timir Ahmed Mohammed, grunaðan um tilraun til manndráps eftir að bifreið var ekið á fjölda vegfarenda í vesturhluta London síðdegis á laugardag. Fimm manns slösuðust í atvikinu en enginn þeirra er talinn í lífshættu.
Atvikið átti sér stað um klukkan 14:30 að staðartíma á Ealing Broadway þegar hvítri bifreið var ekið á hóp vegfarenda áður en ökumaðurinn brunaði af vettvangi.
Þrír slasaðir voru fluttir á sjúkrahús en tveir hlutu meðferð á vettvangi. Samkvæmt lögreglu eru meiðsl þeirra hvorki lífshættuleg né líkleg til að valda varanlegum afleiðingum.
Skömmu síðar handtók lögregla Mohammed í Grange Park, skammt frá vettvangi. Hann er breskur ríkisborgari fæddur í Sómalíu og er grunaður um hættulegan akstur og tilraun til manndráps.
Myndskeið sem farið hafa í dreifingu á samfélagsmiðlum virðast sýna vegfarendur hlaupa á eftir bifreiðinni, sparka í hana og reyna að opna bílhurðina áður en ökumaðurinn gefur í og ekur á brott.
Sérsveit bresku hryðjuverkalögreglunnar tók þátt í rannsókn málsins vegna eðlis atviksins. Lögreglan segir þó að málið sé ekki rannsakað sem hryðjuverk.
BREAKING:
A Somali migrant has been arrested for attempted murder after driving into a group of people in London today.
5 people were wounded pic.twitter.com/XHdV7EvxCX
— Visegrád 24 (@visegrad24) June 27, 2026
