Af öryggisástæðum hefur útsýnissvæðinu við Fosshvamm norðvestur af Dettifossi, einni helstu náttúruperlu Norðausturlands, verið varanlega lokað fyrir umferð þeirra ferðamanna sem þangað flykkjast í þúsundatali á degi hverjum.
Í júní síðastliðnum féll bergskriða við fossinn vestanverðan í kjölfar mikilla rigninga og komu þá víða í ljós sprungur á gljúfurbarminum. Í kjölfarið var svæðinu lokað í öryggisskyni en síðar leiddu rannsóknir í ljós að víðfeðmt sprungunet leynist víða undir jarðveginum.
Guðrún Jónsdóttir, þjóðgarðsvörður á norðursvæði Vatnajökulsþjóðgarðs, segir í samtali við mbl.is að útsýnispallar yfir fossinn verði áfram opnir og unnið verði að uppbyggingu þeirra, auk þess sem unnið verði að endurheimt gróðurs á troðnum slóðum hvammsins.
Ferðamannafjöldi aukist gífurlega
Á degi hverjum sækja um tvö þúsund manns fossinn heim til þess að verða vitni að því ógnarafli sem hann býr yfir, eða um 700.000 manns árlega, en að sögn Guðrúnar hefur fjöldi ferðamanna á þessu litla svæði aukist gífurlega á undanförnum árum.
Flestir þeirra koma að fossinum vestan frá þar sem útsýnispallarnir standa enn opnir, en það návígi við fossinn sem ferðamönnum, sem leið sína lögðu um Fosskambinn, gafst er nú úr sögunni.
„Það er ekki lengur leyfilegt að fara niður í Fosshvamminn sem er alveg næst og við fossinn sjálfan, en það er enn þá mjög gott útsýni á fossinum,“ segir Guðrún. „Margir telja það jafnvel það besta, en ég skil líka að fólk þurfi tíma til þess að laga sig að svona breytingum. Við viljum samt fyrst og fremst að fólk sé öruggt.“
Útsýnið verði ávallt fallegt
Strax í sumar verða innviðir fjarlægðir af sprungusvæðinu í Fosshvammi og gönguleiðir verða færðar með tilliti til þessara breytinga. Áfram verður unnið að frekari uppyggingu göngupalla norðan við fossinn, þar sem gert verður ráð fyrir hringleið.
„Við munum á næstu árum halda áfram með uppbyggingu á göngupöllunum sem við erum með þarna á svæðinu og búa út hringleið,“ segir Guðrún. „Þannig að útsýnið að Dettifossi mun alltaf vera fallegt þrátt fyrir þessar breytingar.“
Aðgætnisleysi hættulegra en sprungunet
Aðspurð hvort sprungunetið sem í ljós kom kunni að reynast öryggisógn á öðrum útsýnisstöðum við fossinn svarar Guðrún því að vel sé fylgst með svæðinu öllu til þess að tryggja öryggi gesta.
„Við erum að bregðast sérstaklega við á þessu svæði vegna þess að ég tel það ekki vera öruggt lengur,“ segir hún. „Það er verið að fylgjast með þessu öllu saman, en svo er náttúran náttúrulega bara eins og hún er, og hún fer sínu fram þegar henni sýnist.“
Meiri öryggishætta stafi af því þegar fólk kemur óundirbúið á svæðið og varar sig ekki fyllilega vel á hálum nípum og öðrum sleipum svæðum. „Fólk þyrfti að vara sig betur á þessu svæði heldur en það gerir, og vera í betri skóm.“
