Fjöldi íbúðarhúsa og barnaspítali var á meðal skotmarka Rússlandshers í loftárásum í nótt.
Árásirnar vörðu klukkustundum saman og að minnsta kosti fimmtán voru drepnir.
Árásirnar í nótt hæfðu meðal annars íbúðablokk í Solmianskyi-hverfi.
Ungt barn lést eftir að hafa orðið undir rústum blokkarinnar.
Var heima þegar árásirnar hófust
Óskar Hallgrímsson, blaðamaður og ljósmyndari, er búsettur í Kyiv höfuðborg Úkraínu. Hann var heima að vinna þegar árásir Rússa hófust í gærkvöld.
Hann segir að þegar viðvörunarbjöllur fóru að hljóma hafi hann flúið inn á baðherbergið á heimili sínu.
„Maður veit að maður hefur bara nokkrar mínútur til að koma sér í skjól.“
Hann sá þá í fréttum að tíu flaugar væru á leiðinni inn í úkraínska lofthelgi í einu.
„Síðan kemur bara svakaleg bylgja hérna niður.“
Óskar segir að flaugarnar sem Rússar notuðu í árásina í nótt séu mjög öflugar.
„Þessar skotflaugar eru með 800 kíló, uppundir tonn af sprengiefnum, það er svakalegt magn. Þegar þær lenda, þá eru þær að lenda á fimm, sex, sjöföldum hljóðhraða niður í jörðina. Við erum að tala um að þessar flaugar eru á stærð við rútu.“
Volodymyr Zelensky, Úkraínuforseti, segir eitt stærsta vandamál Úkraínumanna vera skort á flugskeytum í loftvarnarkerfi, til að verjast loftárásum Rússa.
Óskar tekur undir það.
„Það eru engar loftvarnir til hérna hjá okkur.“
Íbúar sem grétu úr sér augun
Tveir þeirra sem létust voru í íbúðablokk í Solmianskyi-hverfi, sem varð fyrir árás. Ungt barn lést eftir að hafa orðið undir sprengjurústum.
Óskar sá ömmu barnsins grátandi fyrir utan blokkina í dag.
„Ég sá, hérna rétt hjá í næsta hverfi við mig var gömul kona sem var grátandi úr sér augun. Bara öskrandi af því að litla ömmubarnið hennar dó skilurðu.“
Litlu hefur miðað í friðarviðræðum ríkjanna, þvert á móti hafa átökin stigmagnast á síðustu vikum.
Úkraínuher hefur meðal annars gert drónaárásir á Moskvu en bæði ríki hafa þvertekið fyrir að árásir beinist að almennum borgurum.
Óraunhæft að boða til kosninga
Langvarandi árásir Rússa hafa margvísleg áhrif í Úkraínu. Herlög voru sett í landinu þegar Rússar hófu allsherjarinnrás í febrúar 2022.
Fimm ára kjörtímabili Zelenskys lauk í maí 2024 en hann hefur þó haldið áfram í embætti, því í stjórnarskrá Úkraínu er kveðið á um að óheimilt sé að halda forseta- eða þingkosningar á meðan herlögin eru í gildi.
Ekki eru allir sáttir við það.
Mykhailo Fedorov, fyrrverandi varnarmálaráðherra Úkraínu, vill að Úkraínumenn gangi til forsetakosninga.
Fedorov naut mikilla vinsælda í embætti en Zelensky rak hann í júlí eftir deilur Fedorovs við yfirhershöfðinga Úkraínuhers.
Í gær birti Fedorov myndskeið þar sem hann hvetur Úkraínumenn til að berjast fyrir lýðræðislegum rétti sínum til kosninga.
Um hundrað manns tóku undir orð Fedorovs með mótmælum fyrir utan úkraínska þinghúsið í gær.
En til að hægt væri að kjósa þyrfti að breyta stjórnarskrá landsins og ákveða hverjir væru kjörgengir.
Óskar segir að það væri óraunhæft að boða til kosninga nú.
„Hermenn fá ekki að kjósa, geta ekki kosið, hvað með þá sem eru í haldi? Hvað með þá sem eru utanlands og geta ekki komist inn? Hvað með þá sem eru á herteknu svæðunum, ætlarðu ekki að leyfa þeim að kjósa. Þetta er bara það óraunhæfasta sem er til í stöðunni.“
Óþægilegt að það venjist að búa við stríð
Talið er að sex milljónir Úkraínumanna hafi flúið land frá því innrás Rússa hófst.
Óskar telur ólíklegt að orð Fedorovs hrindi af stað mótmælum gegn Zelensky, vinsældir hans séu miklar.
Óskar óttast varnarleysi Úkraínu gagnvart árásum Rússa og segir raunveruleika íbúa í Kyiv vera alvarlegan.
Það sé slæmt að stríðsástand, loftárásir og viðvörunarbjöllur séu orðinn fastur liður í daglegu lífi.
„Þetta eru komin fjögur og hálft ár skilurðu. Hvað ert þú búin að venjast í lífi þínu á fjóru og hálfu ári?“
