Lista­verkið muni auka öryggi og vernda náttúruna á svæðinu - Vísir

„Ég er gríðarlega spenntur fyrir þessu,“ segir Páll Magnússon í samtali við Vísi en hann er oddviti bæjarmálafélagsins Fyrir Heimaey, sem er annar af flokkunum sem mynda meirihluta í bæjarstjórn. Þann tólfta maí verður fyrri hluti verksins vígður og er öllum áhugasömum velkomið að fjölmenna á athöfnina.

„Þetta verður þannig að listamaðurinn sjálfur kemur ásamt sínu fylgdarliði frá Berlín, stúdíóið hans er þar og margir hafa komið að verkinu þaðan. Síðan kemur allavega atvinnuvegaráðherra, Hanna Katrín, ásamt sínu fylgdarliði,“ segir Páll og útskýrir að verkið sé í raun tveir hlutar: kúpullinn og svo göngustígur í kringum gíginn.„Þarna er verið að víga þennan fyrri hluta sem er þessi skáli eða kúpull sem listamaðurinn hannaði og var smíðaður í Þýskalandi og markar upphafið að því að ljúka við göngustíginn í kringum gíginn sem er órjúfanlegur þáttur af upplifuninni,“ bætir hann við.

Ekkert óafturkræft rask

Hann segir skiljanlegt að íbúar í Eyjum hafi haft orð á því að verkið gæti raskað náttúrufegurðinni á svæðinu sem hefur líka mikla tilfinningalega þýðingu fyrir Eyjamenn. En það hafi huggað marga að komast að því að verkið er með öllu afturkræft.

Verkið var unnið í samstarfi við fjölmarga listamenn og kom arkitektastofan Landslag að því ásamt fleirum að sjá til þess að allar framkvæmdir við þetta yrðu afturkræfar.

„Ég held að eftir að Ólafur, listamaðurinn, kom í heimsókn til Vestmannaeyja og hélt fund með íbúum í Eldheimum þar sem þetta var kynnt þá hafi fólk geta andað léttar. Ef til þess kemur eftir hundrað eða tvö hundrað ár að það eigi ekki lengur að standa þá væri til dæmis hægt að loka stígnum og láta allt hverfa án nokkurra ummerkja,“ segir Páll en hann tjáir blaðamanni einnig að verkið muni bæta öryggi á svæðinu.

Auki öryggi á svæðinu

Páll segir aðalkostinn við þetta vera að með göngustígnum sé náttúran vernduð og með því á hann við að í stað þess að það haldi áfram að myndast þarna alls konar troðningar þá verði ákveðin leið fyrir fólk til að ganga eftir. Þessi troðningar séu margir hverjir nálægt brúninni og það geti verið hættulegt að fara eftir þeim.

„Sumir af þessum troðningum eru alveg við brúnina og göngustígur mun þannig verja jarðveginn og sömuleiðis tryggja bætt öryggi þeirra sem ganga hringinn,“ segir Páll.Íris Róbertsdóttir, bæjarstjóri í Vestmannaeyjum, segist vona eindregið að Landeyjarhöfn verði komin í gagnið á næstunni og að allir sem ætli sér til Eyja fyrir athöfnina geti mætt. Þá segir Páll að áætlað sé að seinni hluti verksins, göngustígurinn, verði fullbúinn fyrir lok árs en að framkvæmdir standi yfir í sumar.