Sláturhúsum á landsbyggðinni hefur fækkað undanfarin ár. Eftir standa fimm stór sláturhús sem sjá um langstærstan hluta sauðfjárslátrunar. Þau eru á Húsavík, Sauðárkróki, Hvammstanga, Selfossi og Kópaskeri.
Einar Kári Magnússon er aðstoðarsláturhússtjóri hjá Kaupfélagi Skagfirðinga. Hann segir að stóru sláturhúsin slátri meira en 99% af öllu sauðfé á landinu. Skepnurnar séu oft fluttar um langa leið enda ekkert stórt sláturhús á Suður- og Austurlandi frá Selfossi að Kópaskeri og Húsavík.
Sigurður Hallgrímur Jónsson, bóndi og bílstjóri, hefur séð um akstur á Austurlandi í fjöldamörg ár og flytur þúsundir lamba í hverri sláturtíð.
„Jú, jú, þetta er allt upp í þúsund kílómetrar ferðin. Þá meina ég fram og til baka.“
Skipulag flutninga skiptir öllu máli
Um 380.000 fjár verður slátrað á landinu í ár. Sigurður sér um flutning á ríflega 10% af því til Húsavíkur.
„Ég hef verið að flytja svona 42–46 þúsund, eitthvað svoleiðis,“ segir Sigurður.
Að sögn Einars hjá KS skiptir miklu máli að skipuleggja alla flutninga vel og að nýta ferðirnar sem best. Byggðasjónarmið ráði því að bændurnir greiði ekkert fyrir flutning, sama hvar þeir eru staddir á landinu. Sláturhúsum hefur fækkað á landsbyggðinni og það á ekki að bitna á þeim sem búa fjær sláturhúsum. Kostnaður við flutning á sauðfé til slátrunar nemur tugum milljóna á hverju ári hjá KS.
