Aðalmeðferð í Dettifossmálinu svokallaða hófst í héraðsdómi Reykjavíkur í morgun. Alls eru fjórir ákærðir og snýst málið um smygl á rúmum 14 lítrum af amfetamínbasa til landsins með Dettifossi, gámaskipi Eimskips. Tveir eru taldir hafa skipulagt smyglið og hinir tveir ákærðu, skipverjar sem voru starfsmenn Eimskips þegar smyglið kom upp, eru ákærðir fyrir innflutning.
Þeir játuðu báðir sök að hluta við þingfestingu í júní. Skipuleggjendurnir tveir, Sævar Örn Hilmarsson og Kastriot Pepa, neituðu að mestu við þingfestingu málsins.
Skipverjarnir gáfu skýrslu fyrir dómi í morgun en þeir játuðu báðir að hluta við þingfestingu málsins. Þeir eru Íslendingar rétt yfir tvítugu. Hér verða þeir kallaðir A og B.
„Skíthræddur og stressaður“ fyrir fundinn
A var fyrri til að gefa skýrslu fyrir dómi. Hann átti erfitt með að gefa skýrslu til að byrja með. Hann sagðist hafa komið seint að málinu eftir samtal við hinn skipverjann. Hann hafi farið með honum að hitta mann, sem honum var sagt að væri Sævar. Hann hefði aldrei hitt hann áður og sagðist hafa verið skíthræddur og stressaður fyrir þann fund.
Hann lýsti svo samskiptum á dulkóðaða forritinu Signal þar sem hann hafi verið í samband við aðila undir dulnefninu Cloud sem hafi lýst því hvernig afhending efnanna og innflutningur ætti að fara fram. Lögregla og ákæruvaldið telur að Sævar Örn sé á bak við þann aðgang.
Fenginn til að aðstoða og róa taugar vinar síns
Skipverji B hafi upprunalega verið beðinn um að koma að þessu en hann fengið A með sér í verkið. A taldi að það hefði verið til að róa taugar B, sem hann lýsir sem besta vini sínum og vinnufélaga til nokkurra ára. Spurður um sitt hlutverk sagði hann líta á sig sem burðardýr í málinu. B sagði það sama og að þeir hafi ekki komið á nokkurn hátt að skipulagi eða fjármögnun.
Miklu meira magn en um hafi verið samið
Báðir skipverjarnir lýstu því að þegar þeir hafi tekið við efnunum í Bremerhaven í Þýskalandi hafi þeim báðum brugðið að sjá að þar væri mun meira magn en þeim hafi verið sagt. Þeir hafi búist við sjö lítum en brugðið að heyra hjá lögreglu að þeir hefðu verið 14. A sagðist hafa farið í „algjört panikk“.
Þegar þeir hafi tekið við efnunum hafi honum orðið ljóst að það væri um mun meira magn að ræða og en þeir ekki þorað öðru en að halda áfram með upprunalegu áætlunina.
A sagði í skýrslutöku hjá lögreglu að hann hafi hitt Sævar Örn Hilmarsson ásamt hinum skipverjanum. Hann sendi skilaboð á Sævar Örn á Signal og í kjölfarið fær hann skilaboð frá aðgangi á Signal undir dulnefninu Cloud. A sagðist meðal annars hafa talað við Cloud í síma. Sá hafi talað íslensku og ekki verið með neinn hreim.
Sækjandi spurði þá hvort hann hafi haldið að Cloud væri Sævar og hann sagðist giska á það en vildi ekki fullyrða það. Svo sagðist hann ekki vera viss. Spurður hvort skipverjinn hafi treyst viðkomandi sagðist honum hafa fundist hann þurfa að fylgja vini sínum og að hann treysti þeim sem vinur hans treysti.
„Cloud sendi staðsetninguna á Signal“
Sækjandi birti þá samskipti, sem búið var að eyða af Signal-aðgangi skipverjans, við Cloud. Meðal annars staðsetningu af Google-maps sem skipverjinn sagði að væri staðurinn sem hann og vinur hans ætluðu að taka móti efnunum á í Bremerhaven í Þýskalandi.
Skipverji B segir frá því að upphaflega hafi ótilgreindur maður haft samband við hann og beðið hann um að flytja amfetamínbasa frá Þýskalandi til Íslands. Talað hafi verið um sjö lítra. Hann segist hafa áttað sig á því að um eitthvað ólöglegt væri að ræða en hugsað að því minna sem hann skildi eða vissi, því betra. Hann og hinn skipverjinn hafi fengið skilaboð um að fólkið sem myndi afhenda efnin væri komið og þeir tekið við þeim þar. Hann sagðist hafa samþykkt verkefnið vegna ótta en vildi ekki segja hvað eða hvern hann óttaðist.
Neitaði að svara nokkru um Sævar
Skipverji B lýsir skipverja A sem besta vini sínum. Spurður um tengsl við Sævar Örn sagði hann að þeir væru úr sama hverfi og hann hafi lengi vitað af honum. Þeir væru fjölskylduvinir en ekki í neinum reglulegum samskiptum í gegnum árin. Hann sagðist aldrei hafa hitt eða þekkt Kastroit Pepa fyrr en á Hólmsheiði eftir að málið kom upp.
Skipverji B neitaði að svara öllum spurningum sækjanda um hvort hann hafi átt í samskiptum eða hitt Sævar áður en að hann tók við verkefninu. Hann neitaði raunar að svara nær öllum spurningum sem tengdust Sævari og vildi ekki tjá sig um hann. Sækjandi birti myndir af honum ásamt Sævari í verslun í Breiðholti í lok mars rétt áður en að smyglið átti sér stað.
B sagðist þó hafa átt í samskiptum við Cloud en vildi ekki segja hver hafi komið honum í samband við hann. Eins og áður sagði telur lögregla að Cloud sé Sævar Örn og hann hafi verið í samskiptum við skipverjana. B sagðist aldrei hafa hitt Kastriot Pepa fyrr en á Hólmsheiði eftir að málið kom upp.
Skipverjarnir fullyrtu báðir að þeir hafi ekki komið að skipulaginu með neinum hætti eða fjármagnað. Þeir hafa játað að taka við efnunum og koma þeim til Íslands.
