Embætti Landlæknis segir að brugðist hafi verið við erfiðri mönnunarstöðu á Vogi. Í svörum við fyrirspurn Nútímans vísar það spurningum um starfslok og veikindafjarvistir til SÁÁ, nema öryggi sjúklinga sé stefnt í voða.
Embætti landlæknis heldur áfram úttekt sinni á starfsemi SÁÁ vegna ástandsins sem skapast hefur á sjúkrahúsinu Vogi. Þetta kemur fram í skriflegum svörum Jóhanns M. Lenharðssonar, sviðsstjóra eftirlits og gæða heilbrigðisþjónustu hjá embættinu, við fyrirspurn Nútímans.
Nútíminn spurði embættið meðal annars hvaða áhrif brotthvarf lækna og mönnunarvandinn hefðu haft á mat þess á öryggi sjúklinga og starfshæfi Vogs.
„Embætti landlæknis hefur fylgst náið með stöðu mönnunar frá degi til dags og svo er enn. Enda þótt staðan sé erfið verður ekki annað séð en að hingað til hafi tekist að bregðast við henni,“ segir í svarinu.
Embættið svarar ekki beint hvort það telji ákvarðanir einstakra lækna eða stjórnenda um að hverfa frá störfum hafa átt þátt í þeirri stöðu sem upp kom. Aðspurð um faglega ábyrgð þegar læknar láta af störfum segir embættið að þar sé um mannauðsmál viðkomandi stofnunar að ræða, „nema öryggi sjúklinga sé stefnt í voða“.
Spurt um veikindaleyfi og kröfur í stjórnardeilunni
Fyrirspurn Nútímans var meðal annars send vegna fréttar Morgunblaðsins um að einhverjir læknar í veikindaleyfi hefðu hótað að snúa ekki aftur til starfa nema Anna Hildur Guðmundsdóttir, formaður SÁÁ, segði af sér. Nútíminn spurði hvernig embættið liti á það frá sjónarmiði öryggis sjúklinga ef endurkoma heilbrigðisstarfsfólks væri sett í samband við kröfur um niðurstöðu í stjórnunar- eða starfsmannadeilu. Ekki var óskað eftir mati á heilsufari eða réttmæti veikindaleyfis nokkurs einstaklings.
„Hér er um að ræða mannauðsmál viðkomandi stofnunar og embætti landlæknis kemur ekki að þeim nema öryggi sjúklinga sé stefnt í voða,“ svarar Jóhann.
Af svarinu verður því ekki ráðið hvort embættið hafi kannað þær tilteknu upplýsingar sem Morgunblaðið birti eða hvort það telji þær hafa haft áhrif á öryggi sjúklinga. Embættið segist þó áfram fylgjast grannt með stöðunni á Vogi.
Annar framkvæmdastjóri lækninga hefur nú sagt upp
Fyrri framkvæmdastjóri lækninga SÁÁ, Valgerður Rúnarsdóttir, sagði starfi sínu lausu í kjölfar ágreinings við formann og framkvæmdastjórn samtakanna. Þá þurfti SÁÁ að tryggja að sérfræðilæknir tæki faglega ábyrgð á starfseminni innan frests sem embætti landlæknis setti, ella gat komið til stöðvunar starfsemi Vogs. Jón Áki Jensson geðlæknir tók þá ábyrgð að sér.
Jón Áki hefur nú einnig sagt starfi sínu lausu eftir um tveggja vikna starf. Hann sagði við RÚV í gær að verulegur læknaskortur væri enn til staðar og ekki hefði tekist að finna fullnægjandi lausn.
Í svari til Nútímans segir embætti landlæknis að fagleg læknisfræðileg ábyrgð hafi verið tryggð með ráðningu Jóns Áka. Þótt hann hafi nú sagt upp sé „ekki annað fyrirhugað en að hann vinni uppsagnarfrestinn“.
Úttektinni ekki lokið
Jón Páll Hallgrímsson, fyrrverandi áfengis- og vímuefnaráðgjafi og stjórnarmaður í aðalstjórn SÁÁ, hefur gagnrýnt að umræðan um málið hafi einkum beinst að stjórn samtakanna. Hann telur einnig þurfa að spyrja hvernig þeir sem hurfu frá störfum mátu ábyrgð sína gagnvart sjúklingum og samfellu í þjónustunni.
Spyr hver beri ábyrgð gagnvart sjúklingum Vogs þegar læknar hverfa frá störfum
Svör embættis landlæknis fela ekki í sér niðurstöðu um þá gagnrýni Jóns Páls eða um ábyrgð Valgerðar og annarra lækna á því ástandi sem skapaðist. Embættið leggur áherslu á eftirlit sitt með öryggi sjúklinga og staðfestir að úttekt þess á starfseminni haldi áfram.
