Umboðsmanni Alþingis barst 7. maí síðastliðinn, níu dögum fyrir sveitarstjórnarkosningar, kvörtun frá ónefndum aðila vegna trúnaðarbrests innan sveitarstjórnar, í ónefndu sveitarfélagi, í aðdraganda kosninganna.
Umboðsmaður lauk málinu með bréfi til viðkomandi sem sent var 27. maí, að loknum kosningunum. Nafn viðkomandi sveitarfélags hefur verið afmáð úr opinberri útgáfu bréfsins. Í því kemur fram að kvörtunin lúti nánar tiltekið að meðferð sveitarfélagsins á kvörtun viðkomandi vegna meintra trúnaðarbresta innan sveitarstjórnar í aðdraganda sveitarstjórnarkosninga. Kvörtunin lúti einnig að því að ekkert sjálfstætt úrræði sé til staðar innan stjórnsýslu sveitarfélagsins þegar kvartanir beinist að kjörnum fulltrúum eða aðilum tengdum sveitarstjórn. Hvers eðlis þessir meintu trúnaðarbrestir voru kemur ekki fram.
Umboðsmaður segir það hins vegar ekki hægt að kvarta til embættisins, ef skjóta megi máli til æðra stjórnvalds, fyrr en stjórnvaldið hafi fellt úrskurð sinn í málinu. Þetta ákvæði sé einkum byggt á því sjónarmiði að stjórnvöld skuli fá tækifæri til að leiðrétta ákvarðanir, sem hugsanlega séu rangar, áður en leitað sé til aðila utan stjórnkerfis þeirra, sem umboðsmaður Alþingis sé, með kvörtun.
Bendir umboðmaður kvartandanum á að samkvæmt lögum fari innviðaráðherra með eftirlit með því að sveitarfélög gegni skyldum sínum samkvæmt sveitarstjórnarlögum og öðrum löglegum fyrirmælum. Í því ljósi telur umboðsmaður að kvartandinn eigi fyrst að beina kvörtun sinni til innviðaráðuneytisins. Telji viðkomandi sig enn beittan órétti eftir að ráðuneytið hafi tekið afstöðu til málsins geti hann á ný leitað til umboðsmanns.
