Eigandi Hringekjunnar hringrásarverslunar segir algengt að fólk kaupi hraðtískuflíkur í miklu magni vegna lágs verðs. Frakkar hertu í dag reglur um svokallaða hraðtísku og stefna að því að setja sérstakt gjald á hverja flík, með því vilja stjórnvöld draga úr sölu á ódýrum fatnaði á netinu.
Verðið segir ekki alla söguna
Jana Maren Óskarsdóttir á og rekur verslunina Hringekjuna með eiginmanni sínum. Verslunin selur notaðar flíkur í básaleigu. Jana segir fólk einmitt leita í lægra verð með því að kaupa hraðtísku. En verðið segir þó ekki alla söguna.
„Það sem við höfum alltaf hugsað: Ef verðið er svona lágt, þá hlýtur einhver annar að vera að gjalda fyrir það í keðjunni, framleiðslukeðjunni eða ferlinu. Þannig að það er einhver sem á ekki að fá greitt eða vinnan er ekki í lagi, umhverfið ekki í lagi, gæðin eða hreinlætið.“
Lögðu áherslu á að selja ekki hraðtískuflíkur
Í Hringekjunni er lögð áhersla á að selja ekki hraðtískuflíkur. Til dæmis var í upphafi lögð sérstök áhersla á að selja ekki flíkur frá vörumerkinu SHEIN. Í dag er þó úrvalið töluvert meira og erfitt getur reynst að greina á milli.
Jana segir algengt að fólk kaupi sér jafnvel sömu flíkina í mismunandi stærðum og litum.
„Þannig við erum líka að sjá þetta detta inn hérna hjá okkur, flíkur með miðunum á, eitthvað sem við vitum bara ekki hvað er. Maður sér það bara á frágangi og öðru. En þetta er eitthvað sem fólk er að kaupa sér bara á netinu.“
Hægt er að bera kennsl á hraðtískuflíkur með ýmsum leiðum.
„Maður þarf að koma aðeins við efnið og hugsa og skoða vöruna sem maður er með. En það er kannski helst að skoða miðana inni í, efnin og hvernig gengið er frá þessu.“
