Yfirvöld í Japan hafa viðurkennt að þau þurfi að sporna gegn viðveru erlendra njósnara í landinu. New York Times greindi frá því um helgina að Rússar hefðu gert Japan að „greni njósnara“.
Niðurstaða rannsóknar blaðamanna New York Times var birt á sunnudag. Þar segir að stjórnvöld í Moskvu nýti sér lina njósnalöggjöf í Japan og að landið sé orðið að miðstöð fyrir söfnun leyniþjónustugagna. Þá útvegi Rússar mikið af búnaði í landinu sem nýtist hernum í stríðinu í Úkraínu.
90% af flugskeytum og drónum Rússa innihalda íhluti frá Japan
„Við viðurkennum að samhliða síbreytilegu ástandi öryggismála eykst þörfin fyrir að veita erlendri njósnastarfsemi viðspyrnu, svo sem söfnun viðkvæmra upplýsinga, sem ógnar þjóðaröryggi Japans,“ sagði Minoru Kihara, talsmaður japönsku ríkisstjórnarinnar, í gær.
Kihara tjáði sig ekki með beinum hætti um umfjöllun New York Times en sagði stjórnvöld í Tókýó þurfa að bregðast við af hörku.
Í umfjöllun New York Times segir að úkraínsk stjórnvöld áætli að um 90% af flugskeytum og drónum Rússlandshers innihaldi íhluti sem koma frá Japan.
Japanar vinna að því að koma sér upp leyniþjónustu
Starfsemi rússnesku leyniþjónustunnar er sögð rekin af manni sem starfar undir fölsku flaggi á skrifstofum flugfélagsins Aeroflot í höfuðborginni Tókýó.
Vegna þess að útflutningur frá Japan til Rússlands er háður ýmsum takmörkunum nýta Rússar sér net milliliða í öðrum ríkjum á borð við Víetnam, Úsbekistan og Sri Lanka. Íhlutir eru því fluttir fyrst þangað áður en þeir rata svo á áfangastað í Rússlandi.
Japanar vinna nú að því að setja á laggirnar miðstýrða leyniþjónustu. Það yrði í fyrsta sinn síðan í seinni heimsstyrjöldinni sem slík stofnun er starfrækt í landinu. Stjórnmálaleiðtogar þar í landi hafa leitað til bandamanna sinna í Bandaríkjunum, Ástralíu og Þýskalandi á síðustu mánuðum í leit að aðstoð og ráðum við undirbúninginn.
