Hvalveiðibátarnir Hvalur 8 og Hvalur 9 héldu til veiða um klukkan tíu í gærkvöld. Morgunblaðið greindi fyrst frá.
Enginn hvalur var veiddur við Íslandsstrendur undanfarin tvö ár. Bjarkey Olsen Gunnarsdóttir, þáverandi matvælaráðherra, veitti leyfi eftir að hvalveiðitímabilið átti að hefjast árið 2024 og varð því ekkert af veiðunum.
Þá sagði Kristján Loftsson framkvæmdastjóri Hvals hf. síðasta vor að hvalveiðar myndu ekki borga sig það sumarið og því var enginn hvalur veiddur heldur í fyrra
Í ráðgjöfHafrannsóknastofnunar í ár er lagt til að ekki verði veiddar fleiri en 150 langreyðar og 168 hrefnur, í sumar. Atvinnuvegaráðherra hefur boðað frumvarp um hvalveiðibann í vetur en Bjarni Benediktsson veitti hvalveiðaleyfi til fimm ára 2024.
Hvalur 9 sigldi af stað frá Reykjavíkurhöfn á fimmtudag með mótmælanda um borð í mastri skipsins. Hann fór niður úr mastrinu við komu skipsins í Hvalfjörð um kvöldið og lögregla skutlaði honum í bæinn.
Það er ekki í fyrsta sinn sem mótmælendur koma sér fyrir í möstrum hvalveiðiskipa til að koma í veg fyrir siglingar en árið 2023 héldu tveir mótmælendur til í möstrum skipanna í rúman sólarhring. Þær voru sakfelldar í febrúar á þessu ári fyrir að hafa farið um borð í skipin í heimildarleysi og neitað að yfirgefa þau.
