Hámarksverð fyrir staka strætóferð á Englandi verður tvö pund eða um 346 íslenskar krónur frá og með janúar. Þetta tilkynnti Andy Burnham, forsætisráðherra Bretlands, í dag sem hluta af aðgerðum sínum til að draga úr framfærslukostnaði.
Hámarksverðið á landsvísu er nú þrjú pund en á nokkrum stöðum, til dæmis í London og Manchester þar sem Burnham var borgarstjóri, er verðið lægra.
Keir Starmer, þáverandi forsætisráðherra Bretlands, og Rachel Reeves, þáverandi fjármálaráðherra, hækkuðu hámarksverð fyrir staka strætóferð úr tveimur pundum árið 2024. Þá töldu þau tveggja punda hámarkið ekki sjálfbært.
Sumir borgarstjórar stórborgarsvæða, þar á meðal Burnham, ákváðu að fjármagna framlengingu á lægra hámarkinu á sínum svæðum.
„Góðar og hagkvæmar samgöngur eru nauðsyn. Enginn ætti að vera útilokaður frá þeim vegna kostnaðar og skilinn eftir,“ er haft eftir Burnham í frétt The Guardian.
„En of lengi hefur fólk sagt að ódýrari samgöngur séu ekki í boði. Ég sætti mig ekki við það. Ég hef gert þetta áður og ég mun gera það aftur núna: tveggja punda hámark á fargjöld í strætó fyrir milljónir manna um allt land. Lægri fargjöld munu hjálpa fólki að komast þangað sem það þarf og gefa því andrými til að takast á við framfærslukostnað.“
Áætlunin um hámarksfargjöld í strætó, sem mun gilda um allt England nema í London, er talin kosta meira en 500 milljónir punda eða um 86 milljarða íslenskra króna.
