Hantaveiran hefur mörg afbrigði sem valda sýkingum. Hún kemur frá nagdýrum, rottum, músum og leðurblökum og er frekar sjaldgæf. Einkennin eru mismunandi eftir heimshlutum, en geta verið væg, alvarleg og lífshættuleg.
Guðrún Aspelund, sóttvarnarlæknir segir að einkennin séu fyrst lík flensu. „En svo getur þetta lagst á ýmis líffærakerfi. Það fer svolítið eftir afbrigðunum. Þau geta valdið nýrnabilun, einkennum frá hjarta og lungum, alvarlegum einkennum þannig að fólk getur þurft að fara í nýrnavél og eða öndunarvél. Þetta getur lagst á miðtaugakerfið, þannig að það getur verið mjög mismunandi og getur verið mjög alvarlegt.“
Oftast berst veiran úr rottum eða úrgangi þeirra í menn. Sum afbrigðin geta smitast manna á milli.
„Þetta þyrlast upp og fólk andar þessu að sér, það er algengast og fólk getur borið þetta í vit sér með snertingu,“ segir Guðrún.
Nú hefur veiran í fyrsta sinn greinst um borð í skemmtiferðaskipi og valdið dauðsföllum þar. Þrír liggja í valnum og sjö eru sýktir. Skipið er nú á leið til Kanaríeyja með 147 farþega. Skv. áætlun á það að koma til Íslands í lok maí.
„Við vitum náttúrlega ekki alveg hvernig það verður. Nú er búið að breytast margt þarna. En það er vissulega lagt upp með að skipið komi hingað. En það eru ýmis skilyrði sem að skip þurfa að uppfylla um sóttvarnir og að hafa tilskilin vottorð og leyfi til þess að koma að landi. Þannig að yfirvöld á hverjum stað hafa ráð yfir því. Svo þó að skipið sigli áleiðis hingað það þýðir ekki endilega að það komi hér. En svo gerir maður auðvitað ráð fyrir því að það verði búið að sótthreinsa og gera allar viðeigandi ráðstafanir áður en að skipið fer eitthvað annað,“ segir Guðrún.
Íslensk stjórnvöld hafi valdheimildir til að stöðva komu skipsins til Íslands.
„Það er ekki á forræði sóttvarnalæknis en við höfum alveg valdheimildir til slíks. Bæði varðandi siglingar og að koma í höfn. Þannig að það á ekkert skip að þurfa að koma og leggja hér að sem að við teljum ekki vera öruggt,“ segir Guðrún.
