Atvinnuvegaráðherra hafnar alfarið fullyrðingum Bjarna Benediktssonar, framkvæmdastjóra Samtaka atvinnulífsins, að breytingar á lögum um ársreikninga séu gullhúðun. Atvinnulífið hafi í langan tíma kallað eftir þessum breytingum.
Samtökin hafa sent efnahags- og viðskiptanefnd Alþingis viðbótarathugasemd um frumvarpið – bæði varðandi framsetningu og forsendur þess. Þau segja óásættanlegt að íslensk fyrirtæki búi við strangari reglur en almennt þekkist innan Evrópska efnahagssvæðisins, EES.
Hanna Katrín Friðriksson atvinnuvegaráðherra segir frumvarpinu fyrst og fremst ætlað að létta á pappírsvinnu fyrir lítil fyrirtæki og einyrkja. Þá hafi Sjálfstæðisflokkurinn reynt að koma því í gegn í fyrri ríkisstjórn þar sem lengi hafi verið vilji fyrir breytingum af þessu tagi.
„Ég man ekki betur en að í umræðu um málið þegar ég mælti fyrir því hafi einmitt þingmaður Sjálfstæðisflokksins talað um að hér væri um afhúðun að ræða, ef svo má segja, slík var ánægjan með málið. En af hverju þessi viðbótarumsögn kemur núna með þessari gagnrýni, ég skal ekki segja. Málið er auðvitað bara í þinglegri meðferð og það skoða menn þessa viðbótarumsögn Samtaka atvinnulífsins eins og aðrar umsagnir.“
Sjálfsagt að ríki ESB og EES skilgreini eigin markaði eftir stærð
Í umsögn Samtaka atvinnulífsins um frumvarpið segir að samtökin telji það óásættanlegt að íslensk fyrirtæki búi við strangari reglur en almennt tíðkist innan EES. Hanna Katrín segir það ekki rétt þar sem mikilvægt sé að horfa til stærðar á markaði í hverju landi fyrir sig.
„Ef ég skil þessa viðbótarumsögn Samtaka atvinnulífsins rétt snýst hún fyrst og fremst að því að það er verið að gagnrýna að í frumvarpinu er miðað við þrjú ársverk til þess að fyrirtæki teljist örfyrirtæki á móti því sem er lágmarkið í Evrópusambandinu sem er tíu.“
Þá sé sjálfsagt að hvert ríki innan Evrópusambandsins og innan Evrópska efnahagssambandsins geti skilgreint eigin markað eftir stærð.
„Það vita auðvitað allir að við erum hér á örmarkaði og þess vegna er þessi munur. Það breytir því ekki að þetta nær til yfirgnæfandi fjölda fyrirtækja á Íslandi og er gríðarlegur léttir í allri vinnslu langflestra fyrirtækja á Íslandi. Ég vísa því fullkomlega til föðurhúsanna að þetta sé einhvers konar gullhúðun.“
Spurð hvort það að draga úr gullhúðun sé ekki hluti af stefnu íslenskra stjórnvalda segir Hanna Katrín það vera rétt.
„Þetta er sannarlega stefnan og þetta er ekki gullhúðun heldur er hér verið að taka tillit til mismunandi aðstæðna. Þetta er gríðarleg einföldun á regluverki.“
