Stefnt er á að Herjólfur sigli til Landeyjahafnar síðdegis í dag. Framkvæmdastjóri ferjunnar segir að eftir erfiðan vetur hilli nú undir bjartari tíð.
Aðstæður til siglinga til og frá Vestmannaeyjum hafa verið sérstaklega krefjandi síðustu mánuði, meðal annars vegna veðurs, sjólags og bilunar í rafmótor Herjólfs.
Dýpkun hefur gengið vel síðustu daga og spáin lofar góðu til siglinga næstu daga, segir Ólafur Jóhann Borgþórsson, framkvæmdastjóri Herjólfs.
„Í dag siglum við í rauninni til Landeyjahafnar og munum gera það núna næstu daga, fyrst um sinn bara við kjöraðstæður á háflóði en svo eftir því sem að dýpkuninni vindur fram reiknum við með því að geta smátt og smátt bætt í áætlunina,“ segir Ólafur Jóhann.
„Full áætlun er sjö ferða áætlun hjá okkur milli Vestmannaeyja og Landeyjahafnar og eftir því sem aðstæður verða betri ættum við að geta bætt við fleiri ferðum, og ekki veitir af.“
Skertar samgöngur hafa víðtæk áhrif á íbúa
Ólafur segir skertar samgöngur síðustu mánuði hafa haft víðtæk áhrif á samfélagið í Vestmannaeyjum, meðal annars fyrir fólk sem fari með börn sín til læknis, íþróttahópa, ferðaþjónustu og atvinnulíf. Opnun Landeyjahafnar sé því löngu tímabær.
„Þessi vetur að baki hann er búinn að vera mjög erfiður og við fögnum því að það sé bjartari tíð fram undan. En við getum ekki búið það að eiga von á jafnvel öðrum svona vetri eða aftur og aftur. Þannig að venjulega höfum við verið að opna kannski í mars og jafnvel í síðasta lagi í apríl, en nú þegar það er kominn fimmti maí, það er bara orðið allt, allt of seint.“
Þrátt fyrir að líkur séu á því að siglingar Herjólfs komist aftur í fyrra horf fljótlega segir Ólafur brýnt að komið sé á fót varanlegum ráðstöfunum sem tryggi það að sambærilegar aðstæður haldi ekki áfram að endurtaka sig yfir vetrartímann.
„Það þarf miklu minna venjulega að dýpka yfir sumartímann, en þegar þessar lægðir og miklu straumar koma getur höfnin fyllst á mjög stuttum tíma.“
Hann segir að beðið sé eftir niðurstöðum rannsóknar á Landeyjahöfn og tillögum að úrbótum. Dönsk straumlínustofnun hafi tekið að sér að gera úttekt á höfninni og niðurstöðurnar séu væntanlegar á næstunni.
„Þessi höfn hefur ekki verið fullkláruð síðan hún var tekin í notkun árið 2010 og öll viðmið sem við vorum með, til dæmis varðandi siglingar inn í hana hafa ekki staðist. Núna í fyrsta skiptið eru að koma alvöru úrbætur um það hvernig hægt verði að klára hana og við vonum að þær komist til framkvæmda.“
