Einar Sveinbjörnsson, veðurfræðingur hjá Bliku, segir að skipulagsmálin ættu að vera stóra kosningamálið í vor á höfuðborgarsvæðinu. Skipulagsstefna sveitarfélaganna sé mannfjandsamleg og skerði lífsgæði íbúanna.
Í pistli á Facebook sem hann titlar „Myrkvun byggðarinnar“ segir Einar skipulagsstefnuna sem nú er við lýði á höfuðborgarsvæðinu eiginlega mannfjandsamlega.
Skjólleysi og grátóna umhverfi
Vísar hann í viðtal Morgunblaðsins við spænska arkitektinn Rafael Campos de Pinho um þéttingu byggðar, veðurfarið hér og vilja íbúanna.
„Há og ofurþétt byggðin af S-Evrópskri fyrirmynd sem nú er allsráðandi býr til dimm skuggahverfi vegna lágrar sólarhæðarinnar. Vindar sem blása valda sífelldum næðingi á milli hárra bygginga. Engum hollt á búa við ónóga birtu, skjólleysi og grátóna manngert umhverfi,“ segir Einar. „Skipulagið er hreinlega ógn við lýðheilsu og ótrúlegt að það skuli ekki vera aðalkosningamál framboða stærstu sveitarfélaganna suðvestanlands fyrir kosningarnar nú.“
Lífsgæði í aukahlutverki
Vísar hann einnig í tvær greinar á Vísi, annars vegar í veðurfræðinginn Magnús Jónsson og hins vegar arkitektinn Huldu Hallgrímsdóttur þar sem sagt er að fólk þurfi að vera meðvitaðri sem notendur og setja meiri kröfur á umhverfið sem við búum í.
„Ég held mig við þá kenningu að þessi mál komist varla á dagskrá kosninganna nú þar sem þau eiga vissulega heima, vegna þess að fjarhagur sveitarfélaganna er orðinn „háður“ lóðasölu þar sem nýting hverrar lóðar skuli hámörkuð og þar með tekjur af sveitarfélaga af sölu lóða,“ segir Einar. „Lífsgæði íbúanna verða fyrir vikið í aukahlutverki. Nú er svo komið að þessar íbúðir seljast illa eða alls ekki, og skipulagsstefna síðustu 10-15 ára steytir augljóslega á skeri fyrr en seinna.“
Lóðasalan veigamikil
Hefur færslan vakið töluverða athygli og umræður. Meðal þeirra sem svara í athugasemdum er Egill Helgason, fjölmiðlamaður.
„Punktur sailens er lóðasalan og fasteignagjöldin sem eru orðin svo stór hluti af tekjum sem sveitarfélögin geta ekki verið án ef þau eiga að halda upp sinni þjónustu,“ segir Egill.
Skorti birtuútreikninga
Inn í umræðuna stígur einnig Borghildur Sturludóttir, arkitekt og deildarstjóri skipulagsfulltrúa Reykjavíkurborgar.
„Okkur hefur í langan tíma skort ákvæði í byggingarreglugerð um birtu útreikninga – það var innleitt nú 01. maí // það á að nýta land og innviði betur – en það þarf að gera það með réttu verkfærunum og réttu hvötunum,“ segir Borghildur.
