Bæjarstjórn Akraness hefur ákveðið að færa móttöku fyrir pappír og plast úr bænum og á móttökustöð Gámu í um fjögurra mínútna akstursfjarlægð. Bæjarstjórinn segir íbúa vilja hafa þjónustuna nálægt en íbúar sem bjuggu næst grenndarstöðvunum hafi verið óánægðir.
Ónæði og óþrifnaður fylgir grenndarstöðvunum
Þrjár grenndarstöðvar hafa verið fyrir pappír og plast á Akranesi, hjá Bíóhöllinni, Byggðasafninu og á Dalbraut. Stöðvarnar voru settar upp til bráðabirgða.
Í síðustu viku tilkynnti Akraneskaupstaður áform um að fjarlæga grenndarstöðvarnar við Bíóhöllina og Byggðasafnið og ráðast í endurbætur á stöðinni við Dalbraut. Þar yrði þjónusta aukin, veggeiningar settar upp ásamt bættri lýsingu og myndavélavöktun.
„En eftir nánari skoðun og eftir samtal við íbúa við grenndarstöðina þar sem við ætluðum að sameina í eina, þar kom í ljós mikil óánægja og í rauninni hefur verið mikið ónæði og óþrifnaður af þessum stöðvum,“ segir Sturlaugur Haraldsson, bæjarstjóri á Akranesi. Ákvörðunin var meðal annars tekin í samráði við íbúa.
„Þannig að það kemur alltaf upp sama málið, að þeir sem búa næst þessum grenndarstöðvum, þar kemur upp mikil óánægja og við höfum því gripið til þess ráðs núna að færa móttöku á pappír og plasti til Gámu, sem er gámastöð í útjarðri bæjarins. Það þýðir þá að fólk þarf að leggja á sig núna einhverjar viðbótar þrjár til fjórar mínútur í akstri.“
Höfðasel er í um 3,5 kílómetra fjarlægð frá Akranesi. Þar er Gáma með móttökustöð þar sem íbúar geta losað sig við allan úrgang frá heimilum. Gjald er fyrir förgun úrgangs.
Áfram verða tunnur fyrir plast og pappa við öll heimili og söfnun á gleri, málmum og textíl verður innan bæjarins, enda ekki tunnur við heimili fólks fyrir þessa hluti.
„Helst hefðum við náttúrulega viljað halda þessum stöðvum nær íbúunum þannig að þetta er náttúrulega kannski ekki alveg „ídeal“ en þetta er lausnin sem við erum komin niður á. Ég held að þetta verði ekki stórmál fyrir fólk, að leggja á sig þriggja til fjögurra mínútna keyrslu til að losa sig við þetta.“
Ekki stórkostlegt vandamál fyrir fólk
Fólk komi yfirleitt á bíl að núverandi grenndarstöðvum. „Við höfum ekki orðið vör við það að fólk sé mikið að ganga með stóra pappakassa eða plast um bæinn. Okkur sýnist að öllu jöfnu að fólk sé að koma með þetta í bílum á grenndarstöðvarnar. Þannig að við sjáum þetta ekki sem stórt vandamál.“
Gagnrýni hefur komið upp í íbúahópi bæjarins á Facebook, meðal annars frá fólki sem er ekki á bíl. Sturlaugur segir hægt að finna lausnir á því.
„Ef þetta eru stórar áskoranir hjá ákveðnu fólki er eflaust hægt að finna leiðir til að bregðast við því en að öllu jöfnu þá held ég að þetta sé ekki stórkostlegt vandamál fyrir fólk.“
Grenndargámarnir hafa verið tilraunaverkefni í nokkur ár. Er útséð um að þetta geti gengið? Í sátt og samlyndi við umhverfi og menn?
„Þetta er niðurstaðan núna. Við munum náttúrulega hafa augun opin áfram, með lausnir í þessum málum og reyna að gera þetta sem allra best, með hag bæjarbúa í huga. En þetta er svona okkar niðurstaða núna en við munum klárlega halda áfram að leita að lausnum.“
Sturlaugur segir það ofarlega í huga bæjarstjórnar að gæta að réttindum allra íbúa. Flestir vilji geta losað sig við pappa og plast í grennd við heimilið en á sama tíma verði að gæta hagsmuna íbúa.
„Því miður þá hefur verið talsvert ónæði af þessu og óþrifnaður. Þar af leiðandi höfum við þurft að grípa til þessara aðgerða núna. En eins og ég segi þá verðum við með augun opin og munum leita bestu mögulegra lausna á þessu öllu saman, en þetta er staðan eins og hún er í dag.“
