Grunnskólakennarinn og sáttamiðlarinn Rakel Linda Kristjánsdóttir spyr hvar faglegheitin sé að finna hjá Morgunblaðinu og fordæmir miðilinn fyrir framsetningu þeirra á frétt um úttekt Viðskiptaráðs Íslands á grunnskólakerfinu.
Téð úttekt birtist í dag og er unnin upp úr skýrslu mennta- og barnamálaráðherra um frammistöðu nemenda úr einstökum grunnskólum á lokaprófum í framhaldsskólum. Morgunblaðið skrifaði frétt um úttektina, deildi henni á Facebook og spurði: „Er skóli þíns barns á listanum?“. Spurninguna notar Rakel Linda sem fyrirsögn greinar sem hún birti hjá Vísi í dag.
Rakel segir að bæði Viðskiptaráð og Morgunblaðið gangi út frá því að þessi skýrsla sýni að nemendur búi við ólík tækifæri í grunnskólakerfinu og að hætt sé við að skólakerfið þróist í átt að félagslega aðgreindum skólum þar sem búseta og grunnskóli hafi áhrif á framtíðarmöguleika barna.
Rakel Linda segir að Viðskiptaráð gangi út frá því að grunnskólarnir séu vandamálið sem og einkunnir í bókstöfum. Málið sé þó ekki svo einfalt.
„Ykkur að segja þá er viðskiptaráð ekki að finna upp hjólið og því miður er birtingarmynd skoðana þeirra ekki einstaklingsvæn heldur þess eðlis að draga börn í dilka og breikka bilið á milli skóla enn frekar. Í úttekt viðskiptaráðs er það látið líta út eins og grunnskólarnir séu vandamálið og það að einkunnir hafi verið birtar í bókstöfum en ekki tölustöfum. Þetta er alls ekki svona einfalt.
Við sem störfum í skólum landsins höfum verið að benda á það lengi að skútan sé að sigla í strand og það þurfi að grípa inn í heildrænt þvert á skólastig. Ég er ekki sammála viðskiptaráði varðandi það að gögnin hafi vantað því að við fagfólkið á gólfinu höfum haft í höndunum gögn sem við höfum vísað í máli okkar til stuðnings þegar við höfum bent á vandann.
Greinar eins og þessi sem ég er að vísa í hér að ofan og birtist inni á vefsíðu Morgunblaðsins er til þess fallin að leiða til sundrungar frekar en að stíga skrefið í átt til lausnar. Við skólafólk fáum yfir okkur reiðilestur úti í samfélaginu fyrir það að vera ekki að standa okkur þegar svona greinar birtast opinberlega og börnin í „rauðu“ skólunum skammast sín fyrir skólana sína.“
Ekki hægt að metta marga með hráefni fyrir fáa
Rakel Linda lýsir stöðunni í grunnskólunum með því að vísa til matseldar. Séu hráefnin ekkert annað en mjólk og brauð fyrir fimm einstaklinga sé mjög erfitt að elda úr því hollan þriggja rétta málsverð fyrir 25 einstaklinga. Kennarar hafi lengi bent á hráefnisskortinn í skólakerfinu, þ.e. skort á námsgögnum sem og úrræðaleysi vegna barna með fjölþættan vanda, viðhald skólahúsnæðis sem og annað sem setið hefur á hakanum. Að birta lista eins og Viðskiptaráð gerir sé ekki að leysa þennan vanda heldur auka hann.
„Í öllum þeim skólum sem ég hef starfað í hef ég unnið með frábæru, metnaðarfullu starfsfólki sem hefur brunnið fyrir velferð barna. Þegar ég horfi á lista Viðskiptaráðs þá endurspeglar hann ekki það góða starf sem unnið er í grunnskólunum.
Hvar eru faglegheitin hjá Morgunblaðinu ? Er neyðin virkilega svona mikil að það þarf að nota svona klikkbeitu á greinarnar og villa um fyrir fólki til að ná til lesenda ? Því miður þá eru það svona greinar sem breikka bilið á milli skóla, búa til gjá út í samfélagið og skapa úlfúð. “
Rakel Linda kallar eftir því að umræðan um skólastarf byggi á faglegum forsendum og að hún verði ekki látin bitna á börnunum. Það þurfi að takast á um stöðuna með réttum hætti en ekki með smellibeitum. Umræðan þurfi að byggja á því að andlag hennar eru börn sem samtímis eru framtíð þjóðar okkar.
„Gott skólastarf er dauðans alvara og ber að meðhöndla af nærgætni og fagmennsku. Við erum að tala um fjöregg þjóðarinnar og líf ófleyga einstaklinga.“
