Frakkar æfir yfir barnamisnotkunarmáli - MBL.IS

Reiði hefur gripið um sig meðal fransks almennings eftir að lík, sem talið er vera af ellefu ára gamalli stúlku, fannst í dag skammt frá Puycasquier nærri landinu miðju eftir gríðarlega umfangsmikla leit lögreglu, kafara og fjölda sjálfboðaliða.

Grunur leikur á að líkið sé af ellefu ára gamalli stúlku, Lyhönnu, sem hvarf á föstudaginn skammt frá þorpinu Fleurance þar sem síðast sást til hennar fara upp í bifreið hjá manni.

Sá, sem einkum liggur undir grun lögreglu, er 41 árs gamall tveggja barna faðir sem nú hefur verið handtekinn en það sem vakið hefur slíka reiði hjá almenningi í landinu eru fyrri mál tengd manninum sem saksóknari staðfestir nú að hafi verið vegna barnsnauðgunar en dómskerfið tók ekki á. Í einu málanna er ljóst að lögregla greip ekki til neinna aðgerða.

„Það sem við erum að uppgötva dag eftir dag er algjörlega óbærileg,“ segir Maud Bregeon, talsmaður franskra stjórnvalda, við fjölmiðlana Europe 1 og Cnews og kveður málið vekja upp áleitnar spurningar um hvort lögregluyfirvöld skelli skollaeyrunum við framburði fórnarlamba kynferðisbrotamála.

Lögregla á vettvangi nærri staðnum þar sem líkið fannst. AFP/Ed Jones

Játaði að hafa ekið stúlkunni

Eftir að grunaða voru sýndar upptökur öryggismyndavéla játaði hann að hafa gefið stúlkunni far og kvað hana hafa farið úr bifreiðinni við sundlaug skammt frá.

Nú hefur Clemence Meyer saksóknari stigið fram og segir manninn eiga sér önnur mál og eldri.

Í desember 2017 leitaði móðir til lögreglu og gaf þær upplýsingar að sautján ára dóttir hennar ætti í sambandi við manninn. Málið var lagt niður árið eftir þegar dóttirin gaf þær upplýsingar að sambandinu væri lokið.

Lögregla ræðir við íbúa nærri staðnum þar sem líkið fannst í dag. Henni er legið á hálsi fyrir að hafa ekki aðhafst í fjölda mála á hendur þeim sem nú liggur helst undir grun lögreglu í málinu. AFP/Ed Jones

Í janúar 2022 var maðurinn sakaður um að hafa nauðgað barni undir fimmtán ára aldri á heimili hans í Suðvestur-Frakklandi árið 2020. Var málið sent saksóknara staðarins en það fellt niður árið 2024 vegna skorts á sönnunargögnum.

Þriðja málið innan við ársgamalt

Þriðja málið kom upp í ágúst í fyrra þegar móðir stúlku, sem fædd er árið 2014, sakaði manninn um að hafa nauðgað dóttur hennar á heimili hans á tímabilinu frá september 2024 og þar til í maí í fyrra. Var það mál í fyrstu rannsakað í nágrannabænum Toulouse og í kjölfarið sent saksóknara í heimabæ mannsins sem krafðist lögreglurannsóknar í janúar á þessu ári.

Hafði engin yfirheyrsla þó átt sér stað í málinu þegar Lyhanna hvarf í síðustu viku.

Laurent Nunez innanríkisráðherra Frakklands sagði á franska þinginu í gær að hann hefði nú krafist þess að dómsmálaráðuneytið hæfi rannsókn á málum grunaða.

Talið er líklegt að líkið sem fannst í dag sé af Lyhönnu, ellefu ára gamalli stúlku sem hefur verið saknað síðan á föstudaginn. AFP/Úr einkasafni

Krefst heildstæðra laga

Anne-Cecile Mailfert, talsmaður aðgerðasamtaka kvenna, segir skilvirkari lagasetningar þörf svo fyrirbyggja megi kynferðisofbeldi. „Mér er brugðið og ég er reið,“ skrifar Mailfert á Instagram-síðu hópsins eftir að hún áttaði sig á því að grunaði hefði sætt ásökunum áður.

„Önnur tíu ára gömul stúlka hafði hugrekki til að segja foreldrum sínum frá. Þeir studdu hana, þeir trúðu henni, hún fór til lögreglunnar sem skráði málið niður og svo gerðist ekki neitt,“skrifar Mailfert.

„Við krefjumst heildstæðrar löggjafar gegn kynferðisofbeldi vegna þess að kerfið virkar ekki,“ eru lokaorð Mailfert.