Fertugur karlmaður, sem grunaður er um að hafa brotið ítrekað kynferðislega gegn barni á sem var í fóstri á heimili hans, hefur verið úrskurðaður í gæsluvarðhald til 22. júlí á grundvelli almannahagsmuna. Þetta staðfestir Alda Hrönn Jóhannsdóttir yfirlögfræðingur hjá lögreglunni á Suðurnesjum.
Maðurinn var handtekinn um miðjan maí og húsleit gerð á heimili hans eftir að barnaverndaryfirvöld vöktu athygli lögreglu á meintum brotum mannsins. Hann hefur verið í haldi lögreglu síðan. Maðurinn býr á Suðurnesjum og er með nokkur börn í fóstri.
Sem stendur beinist rannsókn lögreglu einungis að broti gegn einu barni. Barnið er á grunnskólaaldri.
Alda Hrönn segir rannsókn langt komna. Gæsluvarðhaldið sé byggt á sterkum rökstuddum grun um brot og gert er ráð fyrir að maðurinn sæti gæsluvarðhaldi þar til dómur fellur í málinu.
