Helga Dögg Sverrisdóttir skrifar:

Danska ríkisstjórnin hyggst breyta reglum um hverjir geta fengið dvalarleyfi samkvæmt sérlögum um Úkraínu. Karlar á aldrinum 23–60 ára, sem eru ekki undanþegnir herþjónustu, fá ekki lengur dvalarleyfi í Danmörku samkvæmt nýju lögunum. 

Það er eftirtektarvert að ríkisstjórn Dana ákveður að það séu einungis karlmenn sem verða að fallbyssufóðri í Úkraínu. Þeir gera upp á milli kynjanna í þessum efnum og ota ungum sem eldri karlmönnum út í stríðið. 

Eftir innrás Rússlands í Úkraínu, árið 2022, samþykkti breiður meirihluti danska þingsins sérlög um Úkraínu. Lögin veita einstaklingum sem hafa flúið frá Úkraínu tímabundið dvalarleyfi í Danmörku.

Nú skal herða reglurnar

Ríkisstjórnin vill nú herða þessar reglur til að koma í veg fyrir að úkraínskir ríkisborgarar noti þær til að komast hjá herskyldu og herkvaðningu í úkraínska herinn.

Útlendinga- og aðlögunarráðherrann, Morten Bødskov, segir:

„Danmörk stendur þétt við hlið Úkraínu í baráttu landsins fyrir frelsi. Þess vegna breytum við nú sérlögunum um Úkraínu, því það var aldrei ætlunin að reglur okkar um dvalarleyfi yrðu notaðar til að komast hjá herkvaðningu í úkraínska varnarliðsins. Slíkt grefur undan stríðsrekstri Úkraínu og veikir möguleika landsins til að verja sig gegn árásum Rússlands.“

Tillagan mun ekki hafa áhrif á dvalarleyfi sem þegar hafa verið veitt.

Gera má ráð fyrir að aðrar þjóðir taki upp sambærilegar reglur, til að manna herafla Úkraínu. Hvort þetta hafi komið til tals innan ríkisstjórnar Íslands er ekki vitað, í það minnsta hefur ekkert komið fram um málið.

Ríkisstjórn Danmerkur fylgist náið með þróun mála varðandi fólk sem hefur flúið frá Úkraínu og mun reglulega meta hvort þörf sé á frekari breytingum á sérlögunum um Úkraínu og reglum sem gilda um fólk á flótta í Danmörku.

Í byrjun maí 2026 bjuggu um 47.600 einstaklingar, sem höfðu flúið frá Úkraínu og fengið dvalarleyfi samkvæmt sérlögunum um Úkraínu, í Danmörku.

Munur á milli kynjanna

Það er eftirtekarvert að Danir telja konur ekki hæfar til herþjónustu í Úkraínu, því herðing laganna gildir bara um karlmenn. 

Danir láta að því liggja að konur megi flýja frá landinu, svo spyrja má af hverju þessi mismunun á kynjunum. Af hverju er körlum mismunað á grundvelli kyns. Löglegt?

Með þessari ráðstöfun viðurkenna Danir mun á líkamlegum styrk, getu og þoli sem er á milli kynjanna, karli og konu.

Skrifin byggjast á: Regeringen vil begrænse ukraineres adgang til Danmark