Finnska þingið hefur samþykkt umdeilda breytingu á áfengislögum. Með breytingunni verður netsala áfengis heimiluð, þar á meðal á sunnudögum.
Ríkisstjórnin sem tók við í Finnlandi 2023 lofaði að létta hömlum af áfengissölu í landinu, en frumvarpið hefur verið mjög umdeilt síðan það var fyrst lagt fram 2024.
Gagnrýnendur segja ný lög geta ýtt undir áfengisneyslu og haft slæm áhrif á lýðheilsu. Frumvarpið var að lokum samþykkt með 98 atkvæðum gegn 77 í finnska þinginu í dag.
Í Finnlandi má aðeins selja áfengi með yfir 8% vínanda í ríkisreknum Alko-verslunum og á veitingastöðum með vínveitingaleyfi, að þeim skilyrðum gefnum að áfengisins sé neytt á staðnum. Verslanir mega selja áfenga drykki með vínanda undir 8%.
Það breytist ekki með nýju lögunum, en þó má Alko hafa opið á sunnudögum og heimilt verður að lengja opnunartíma á virkum dögum til klukkan 21. Þá verður Alko, veitingastöðum og verslunum heimilt að bjóða upp á netsölu og heimsendingu á áfengi.
Með lögunum verður finnskum neytendum einnig heimilt að versla áfengi frá öðrum ríkjum innan Evrópska efnahagssvæðisins.
