Þeir sem ferðast utan Evrópska efnahagssvæðisins (EES) verða ekki tryggðir gagnvart kostnaði vegna slysa eða veikinda frá næstu áramótum. Þetta er meðal breytinga sem samþykktar voru á Alþingi í síðustu viku á lögum um sjúkratryggingar.
Í tilkynningu á vef Stjórnarráðsins er ferðalöngum bent á að kanna tryggingarétt sinn hjá tryggingafélögum og athuga kortatryggingar sínar.
Önnur breyting sem verður á lögunum er að Sjúkratryggingar fá auknar heimildir til gagnaöflunar og eftirlits til að tryggja rétta framkvæmd og greiðslur.
Þá verður bið einstaklinga sem flytja til Íslands frá ríkjum utan EES eftir því að verða sjúktratryggður stytt úr sex mánuðum í þrjá mánuði eftir að viðkomandi skráir lögheimili sitt á Íslandi.
