Nær fjórðungi færri skemmtiferðaskip koma til Akureyrar en í fyrra, með 50 þúsund færri farþega. Þrátt fyrir fækkunina hefur samdrátturinn þó einna minnst áhrif á Akureyrarhöfn. Smærri hafnir, eins og á Húsavík og Raufarhöfn, sem hafa fram til þessa sótt í sig veðrið, finna frekar fyrir þessu.
Til Raufarhafnar komu fimm skip með fimmtán hundruð farþega í fyrra. Ekkert skip kemur þangað í ár. Svipaða sögu er að segja af minni höfnum á landsbyggðinni. 39% fækkun er á Borgarfirði Eystra, 28% á Djúpavogi og 69% á Siglufirði. Talið er tollahækkanir og óvissa sem þeim fylgi valdi því að skipin sæki frekar í stærri hafnir.
Skemmtiferðaskip skiluðu um 4,3 milljörðum króna í hafnartekjur víðs vegar um landið árið 2025. Ljóst er að skipum fækkar enn meira árið 2027 miðað við bókunarstöðu.
